Syn byłoha baskietbalista zbornaj Biełarusi vyjhraŭ junijorski čempijanat śvietu ŭ składzie zbornaj ZŠA

Syn byłoha baskietbalista zbornaj Biełarusi Valeryja Chamieni, jaki ŭ pačatku 2000-ch pakinuŭ Hrodna i pierajechaŭ u ZŠA, dasiahnuŭ hučnaha pośpiechu. Nikałas Chamienia, jakomu ciapier 18 hadoŭ, vyjhraŭ razam sa zbornaj ZŠA zołata junijorskaha čempijanatu śvietu U-19, što prajšoŭ u Šviejcaryi, piša «Trybuna».

Nikałas Chamienia

Valeryj Chamienia naradziŭsia ŭ Hrodnie, u 1990-ch byŭ adnym z samych pierśpiektyŭnych biełaruskich baskietbalistaŭ: kapitanam kamandy RVAR, hulcom nacyjanalnaj zbornaj, udzielnikam mižnarodnych turniraŭ. Jon pasprabavaŭ zamacavacca ŭ ZŠA, ale nie trapiŭ u NBA, paśla čaho vystupaŭ u Rasii i Biełarusi. U 2004-m pajechaŭ da žonki ŭ Amieryku i bolš nie viarnuŭsia, faktyčna zaviaršyŭšy karjeru. Ciapier pracuje dziciačym trenieram u pryvatnaj akademii BTI ŭ Łos-Andželesie.

Jahony syn Nikałas naradziŭsia ŭžo ŭ ZŠA ŭ 2006 hodzie. U junactvie zajaviŭ pra siabie ŭ škole Harvard-Uestłejk, a potym staŭ hulcom «Dziuk Blu Deviłs» — adnaho z najmacniejšych univiersiteckich kłubaŭ krainy. U 2024-m jon vyjhraŭ Kubak Amieryki U-18 i ČS 3ch3 U-18, dzie byŭ pryznany najlepšym hulcom turniru.

Nikałas Chamienia z baćkam

Na junijorskim čempijanacie śvietu U-19 2025 hoda zbornaja ZŠA ź Nikałasam Chamieniem u svaim składzie daminavavała, vyjhraŭšy ŭsie siem matčaŭ z rekordnaj vynikovaściu (u siarednim bolš za 114 ačkoŭ za hulniu). U finale suprać zbornaj Hiermanii amierykancy pieramahli ź likam 109:76. Chamienia nabiraŭ u siarednim 9,7 ačka, 3,1 padbor i 2 pieradačy za 15 chvilin hulni.

Analityki ličać Nikałasa Chamieniu adnym z najbolš pierśpiektyŭnych maładych hulcoŭ. Pavodle prahnozaŭ ESPN, jon moža trapić u top-15 draftu NBA-2026.

Kamientary da artykuła