Pahladzicie, jakija rečy stvaryli biełaruskija dyzajnierki, natchniajučysia Paleśsiem i pieraasensoŭvajučy asabisty bol

Atrymałasia vielmi niezvyčajna.

U miežach rezidencyj pad patranažam polskaj fundacyi «Kraina» biełaruskija dyzajnierki stvaryli kalekcyi, natchnionyja biełaruskimi tradycyjami i aktualnymi pieražyvańniami. 

Tak, dyzajnierka Taša Kacuba vypuściła novuju kapsułu pad nazvaj Transition. Dla Tašy hetaja kalekcyja i jaje pakaz — heta asabistaja historyja pra bol, pamiać i acaleńnie praz tkaninu i formu.

Fota: Tina Zaborowska

Dziaŭčyna i raniej vykazvałasia na balučyja dla jaje temy movaj šyćcia — adzin sa svaich kaściumaŭ «Nadzieja» jana stvaryła padčas pratestaŭ 2020 hoda ŭ Biełarusi. Praces jaho naradžeńnia byŭ dla Tašy hłyboka terapieŭtyčnym. Praŭda, kaścium pryjšłosia pakinuć u Biełarusi, tamu na adnym z majstar-kłasaŭ za miažoj jana razam ź inšymi ŭdzielnikami ŭznaviła takuju asabistuju dla siabie reč.

2020 hod. Fota: chrysalismag.org

Na majstar-kłasie. Fota: fundacjakraina / Instagram

Dyzajnierka, mastačka, etnahrafistka Maša Maroz u svaich pracach natchniajecca biełaruskaj tradycyjnaja kulturaj, u pryvatnaści — historyjami i vobrazami Paleśsia.

Jana nie tolki stvaraje adzieńnie i ŭpryhožvańni, ale i, naprykład, ilustruje knihi. Adnu ź ich — «Moje baba — diriektor morha» Maryja prailustravała zdymkami sa svaich siami hadoŭ ekśpiedycyj na Paleśsie.

Viadomyja zavušnicy dyzajnierki, kožnaja z par — u adzinym vykanańni.

Jaje apošni prajekt «Ruń» — kapsulnaja kalekcyja žanočaha adzieńnia — taksama zasnavany na etničnych kaściumach i abradach Paleśsia.

View this post on Instagram

A post shared by fotohrafka Varšava / photographer Warsaw (@klacayu_po_fotiku)

Chor Spievy prezientuje kalekcyju «Ruń» u formie karahoda, jaki ličycca kołam adradžeńnia i lekavańnia.

Novaj porcyjaj tvorčaści paradavała svaich prychilnikaŭ Nastaśsia Rydleŭskaja — mastačka, śpiavačka i paetka.

Tradycyjna Nastaśsia pracuje z pałotnami jak žyvapisiec i hrafičny dyzajnier, stvarajučy nievialikija abjekty — takija, jak zavušnicy i broški, roznyja maski, što nahadvajuć rytualny rekvizit ci ezateryčnyja znaki, — a taksama maštabnyja instalacyi vyšynioj u niekalki mietraŭ. Jaje tvorčaść takaja ž jarkaja, jak i sama dziaŭčyna. Ahułam da mastactva Nastaśsia stavicca jak da sposabu atrymlivać asałodu ad žyćcia i davać rady z paŭsiadzionnymi składanaściami — sindromam Tureta, bipalarnym rasstrojstvam i pavyšanaj čullivaściu.

Prykłady prac Nastaśsi Rydleŭskaj. Fota: rydlevskaya_a / Instagram

Nastaśsia z pamahatymi rasšyvaje pacierkami novyja tvory. Fota: rydlevskaya_a / Instagram

Prajekt, jaki jana realizoŭvała ŭ miežach rezidencyi, pryśviečany biełaruskim palityčnym viaźniam.

«Heta manumientalnaja scenahrafija, jakaja źlivajecca z vyjavaj tvaru, najvyšejšym vyrazam prysutnaści adčuvalnaści. Tvar robicca tut kropkaj sustrečy, praź jakuju ŭźnikajuć etyčnaja pierśpiektyva i adradžeńnie čałaviečaha vymiareńnia. Dla mianie heta sposab viarnuć hodnaść tym, kaho represii pazbavili tvaru», — raskazvała mastačka.

Hetaja scenahrafija budzie prezientavanaja 30 žniŭnia ŭ Varšavie ​​na pakazie mod z udziełam biełaruskich dyzajnieraŭ. U hety ž dzień adbudziecca finalnaja impreza prahramy Refashioned — inicyjatyvy, što abjadnoŭvaje maładych tvorcaŭ ź Biełarusi, Ukrainy i Polščy dla stvareńnia kalekcyj ekałahičnaha adzieńnia. Svaje pracy tam prademanstrujuć Ala Chlaba, Vola «Etyka», Naścia «Kanva», Kaciaryna Nieściarovič (Froufrouandloukoum) i inšyja.

View this post on Instagram

A post shared by KANVA / Folk fashion brand from Minsk (@kanva_kasciume)

Na mierapryjemstvie biełaruskija dyzajniery pakažuć svaje pracy, stvoranyja z vykarystańniem pierapracavanych materyjałaŭ, jakija spałučyli ŭ sabie roznyja tradycyjnyja i sučasnyja techniki, kab raskazać svaje historyi praz adzieńnie.

Kamientary da artykuła