Паглядзіце, якія рэчы стварылі беларускія дызайнеркі, натхняючыся Палессем і пераасэнсоўваючы асабісты боль
Атрымалася вельмі незвычайна.
У межах рэзідэнцый пад патранажам польскай фундацыі «Краіна» беларускія дызайнеркі стварылі калекцыі, натхнёныя беларускімі традыцыямі і актуальнымі перажываннямі.
Так, дызайнерка Таша Кацуба выпусціла новую капсулу пад назвай Transition. Для Ташы гэтая калекцыя і яе паказ — гэта асабістая гісторыя пра боль, памяць і ацаленне праз тканіну і форму.
Фота: Tina Zaborowska
Дзяўчына і раней выказвалася на балючыя для яе тэмы мовай шыцця — адзін са сваіх касцюмаў «Надзея» яна стварыла падчас пратэстаў 2020 года ў Беларусі. Працэс яго нараджэння быў для Ташы глыбока тэрапеўтычным. Праўда, касцюм прыйшлося пакінуць у Беларусі, таму на адным з майстар-класаў за мяжой яна разам з іншымі ўдзельнікамі ўзнавіла такую асабістую для сябе рэч.
2020 год. Фота: chrysalismag.org
На майстар-класе. Фота: fundacjakraina / Instagram
Дызайнерка, мастачка, этнаграфістка Маша Мароз у сваіх працах натхняецца беларускай традыцыйная культурай, у прыватнасці — гісторыямі і вобразамі Палесся.
Яна не толькі стварае адзенне і ўпрыгожванні, але і, напрыклад, ілюструе кнігі. Адну з іх — «Мое баба — діректор морга» Марыя праілюстравала здымкамі са сваіх сямі гадоў экспедыцый на Палессе.
Вядомыя завушніцы дызайнеркі, кожная з пар — у адзіным выкананні.
Яе апошні праект «Рунь» — капсульная калекцыя жаночага адзення — таксама заснаваны на этнічных касцюмах і абрадах Палесся.
Хор Spievy прэзентуе калекцыю «Рунь» у форме карагода, які лічыцца колам адраджэння і лекавання.
Новай порцыяй творчасці парадавала сваіх прыхільнікаў Настасся Рыдлеўская — мастачка, спявачка і паэтка.
Традыцыйна Настасся працуе з палотнамі як жывапісец і графічны дызайнер, ствараючы невялікія аб'екты — такія, як завушніцы і брошкі, розныя маскі, што нагадваюць рытуальны рэквізіт ці эзатэрычныя знакі, — а таксама маштабныя інсталяцыі вышынёй у некалькі метраў. Яе творчасць такая ж яркая, як і сама дзяўчына. Агулам да мастацтва Настасся ставіцца як да спосабу атрымліваць асалоду ад жыцця і даваць рады з паўсядзённымі складанасцямі — сіндромам Турэта, біпалярным расстройствам і павышанай чуллівасцю.
Прыклады прац Настассі Рыдлеўскай. Фота: rydlevskaya_a / Instagram
Настасся з памагатымі расшывае пацеркамі новыя творы. Фота: rydlevskaya_a / Instagram
Праект, які яна рэалізоўвала ў межах рэзідэнцыі, прысвечаны беларускім палітычным вязням.
«Гэта манументальная сцэнаграфія, якая зліваецца з выявай твару, найвышэйшым выразам прысутнасці адчувальнасці. Твар робіцца тут кропкай сустрэчы, праз якую ўзнікаюць этычная перспектыва і адраджэнне чалавечага вымярэння. Для мяне гэта спосаб вярнуць годнасць тым, каго рэпрэсіі пазбавілі твару», — расказвала мастачка.
Гэтая сцэнаграфія будзе прэзентаваная 30 жніўня ў Варшаве на паказе мод з удзелам беларускіх дызайнераў. У гэты ж дзень адбудзецца фінальная імпрэза праграмы Refashioned — ініцыятывы, што аб'ядноўвае маладых творцаў з Беларусі, Украіны і Польшчы для стварэння калекцый экалагічнага адзення. Свае працы там прадэманструюць Аля Хляба, Воля «Этыка», Насця «Канва», Кацярына Несцяровіч (Froufrouandloukoum) і іншыя.
На мерапрыемстве беларускія дызайнеры пакажуць свае працы, створаныя з выкарыстаннем перапрацаваных матэрыялаў, якія спалучылі ў сабе розныя традыцыйныя і сучасныя тэхнікі, каб расказаць свае гісторыі праз адзенне.
Чытайце таксама:
Тры беларускія дызайнеркі паказалі калекцыі на прэстыжным паказе ў Брусэлі ФОТЫ
Mark Formelle выпусціла калекцыю на балотную тэматыку
Сукенкі за 135 рублёў, футболкі — за 120. У Мінску адкрылася новая крама беларускіх дызайнераў
«Дактары давалі 50%, што буду на інвалідным вазку». Чым сёння жыве мадэльер Саша Варламаў