U Rasii prosicca na vajnu asudžany na pažyćciovaje źniavoleńnie kiraŭnik hrupoŭki kileraŭ

Asłan Hahijeŭ, viadomy pa mianušcy Džako, — adzin z najbolš znakamitych kryminalnych aŭtarytetaŭ Rasii, jaki atrymaŭ pažyćciovaje źniavoleńnie za stvareńnie i kiraŭnictva bujnoj złačynnaj hrupoŭkaj kileraŭ. Z 2023 hoda jon adbyvaje pakarańnie ŭ kałonii strohaha režymu «Mardoŭskaja zona», a niadaŭna padaŭ zajavu z prośbaj adpravić jaho na vajnu z Ukrainaj, daviedaŭsia «Kommiersant'».

Asłan Hahijeŭ (Džako). Fota: Vasilij Dziaruhin / Kommiersant'

Pakul nieviadoma, ci mohuć pažyćciova asudžanyja lehalna zaklučać padobnyja kantrakty. Prynamsi, dakładna paćvierdžanych vypadkaŭ pakul što nie było. Adnak niekatoryja krynicy vydańnia śćviardžajuć, što dla asobnych vypadkaŭ mohuć zrabić vyklučeńnie.

Na fonie hetych čutak u internecie źjaviŭsia aŭdyjazapis, nibyta zrobleny Džako, dzie jon śćviardžaŭ, što ŭžo na voli i znachodzicca niedaloka ad miažy. Hety zapis vyklikaŭ paniku siarod svajakoŭ achviar jaho bandy, jakija stali źviartacca da advakataŭ i ŭ Fiederalnuju słužbu vykanańnia pakarańniaŭ, kab pravieryć infarmacyju. Aficyjna jaje nie paćvierdzili.

Pavodle viersii śledstva, jašče ŭ 2004 hodzie Hahijeŭ stvaryŭ arhanizavanuju złačynnuju hrupu, jakaja dziejničała ŭ Maskvie, Padmaskoŭi i Paŭnočnaj Asiecii. U skład hrupoŭki ŭvachodziła nie mienš za 50 kileraŭ.

U 2012 hodzie jon sfarmavaŭ u Paŭnočnaj Asiecii try asobnyja bandy, zabiaśpiečyŭšy ich hrašyma, zbrojaj i ekipiroŭkaj. Metaj było zamacavać daminujučy ŭpłyŭ u kryminalnym śviecie rehijona.

Usiaho hrupoŭka ździejśniła 49 napadaŭ i zabiła 60 čałaviek.

Siarod achviar byli viadomyja bankiry, biznesmieny, čynoŭniki i siłaviki: uładalnik banka «Nacyjanalny kapitał» Dźmitryj Płytnik, akcyjanier Sodbiznesbanka i banka «Kredyttrast» Alaksandr Ślesaraŭ, kiraŭnik banka «Kutuzaŭski» Aleh Navasielski, uładalnik niamieckich vierfiaŭ Wadan Yards Andrej Burłakoŭ, načalnik upraŭleńnia MUS Paŭnočnaj Asiecii Mark Miecajeŭ i śledčy SKR Aleh Lavonaŭ.

Tym nie mienš, z-za mižnarodnych jurydyčnych abmiežavańniaŭ sudzili Hahijeva tolki za padziei 2012—2013 hadoŭ. Aŭstryja, jakaja vydała jaho Rasii, nie dała dazvołu na praciah rasśledavańnia bolš daŭnich złačynstvaŭ. U vyniku Džako pryznali vinavatym tolki ŭ zabojstvie šaści čałaviek, siarod jakich namieśnik prakurora Pramysłovaha rajona Uładzikaŭkaza Aleh Azijeŭ.

U adroźnieńnie ad jaho, bolšaść paplečnikaŭ Džako atrymali pakarańni za ŭsiu sieryju rezanansnych zabojstvaŭ. Niekatoryja asudžanyja taksama atrymali pažyćciovyja terminy.

Jurydyčna ŭdzieł pažyćciova asudžanych u bajavych dziejańniach u Rasii nie praduhledžany. Kateharyčna vyklučajecca mahčymaść udziełu ŭ vajnie dla piedafiłaŭ, terarystaŭ i asob, asudžanych za dziaržaŭnuju zdradu. Ale, pavodle krynic «Kommiersanta», rasijskija ŭłady mohuć zrabić vyklučeńnie i dla pažyćciova asudžanych. U takim vypadku, kali Hahijeŭ sapraŭdy trapić na front i atrymaje dziaržaŭnuju ŭznaharodu, u jaho źjavicca šaniec vyjści na volu.

Cikava, što jašče padčas ahučvańnia prysudu ŭ 2023 hodzie Hahijeŭ skazaŭ svajakam, što vyjdzie praz hod, nibyta pradčuvajučy taki scenaryj.

Kamientary da artykuła