Ukraina naniesła ŭdar pa bazie rasijskich dronaŭ u Krymie

Va Ukrainie paviedamili, što ŭ vyniku udaraŭ pa Krymie paciarpieła baza rasijskich udarna-raźviedvalnych dronaŭ. Pavodle paviedamleńnia VMS Ukrainy, byŭ źniščany punkt bazavańnia BPŁA na aeradromie «Chiersanies» u Sievastopali.

Ukrainskija vajskoŭcy śćviardžajuć, što źniščanyja da troch dronaŭ Mohajer‑6 i dva «Farposty», jakija Rasija vykarystoŭvała dla nazirańnia za situacyjaj u Čornym mory. Ukrainskija ŚMI adznačajuć, što paśla ataki Čarnamorski fłot RF «zastaŭsia biez voka».

Data napadu dakładna nie paznačajecca, ale miascovyja žychary paviedamlali pra vybuchi nočču ŭ čaćvier. Pryznačany Maskvoj kiraŭnik Sievastopala śćviardžaŭ, što huki byli nibyta źviazanyja z vučeńniami Čarnamorskaha fłotu i dziejnaściu ekstrannych słužbaŭ. Zdymki NASA pakazvajuć, što paśla incydentu na «Chiersaniesie» adbyŭsia pažar, jaki doŭha nie mahli patušyć.

Mohajer‑6 — iranski ŭdarna-raźviedvalny BPŁA: raźvivaje chutkaść da 200 km/h, moža znachodzicca ŭ pavietry da 12 hadzin, niasie rakiety i karektavanyja avijabomby da 100 kiłahramaŭ.

«Farpost» — siarednievyšynny raźviedvalny BPŁA z radyjołakacyjnaj stancyjaj, jaki moža znachodzicca ŭ pavietry da 17,5 hadzin, dziejničaje ŭ radyusie da 250 km, niasie kiravanyja rakiety i płaniernyja bomby dla ataki ruchomych i stacyjanarnych celaŭ.

Raniej, u pačatku žniŭnia, SBU paviedamlała pra ŭdary pa aeradromie «Saki» ŭ Krymie: tam byŭ źniščany adzin šmatmetny samalot Su-30SM, paškodžany druhi, a taksama źniščanyja try frontavyja bambaviki Su-24 i skład z uzbrajeńniem.

Kamientary da artykuła