Alimpijski litrboł. Viktar Łukašenka i Alaksandr Zajcaŭ zapuścili ŭłasnuju sietku kram ałkaholnaj pradukcyi
U Biełarusi źjavilisia novyja ałkakramy «Dub zialony». Ich zapuściŭ biźniesmien Alaksandr Zajcaŭ, blizki da siamji Łukašenki čałaviek. A jaho partnior pa hetym biznesie — Viktar, syn Alaksandra Łukašenki i kiraŭnik Nacyjanalnaha alimpijskaha kamiteta.
U lipieni 2025 hoda ŭ Pružanach, na małoj radzimie «kašalka» Łukašenki Alaksandra Zajcava, adkryłasia pieršaja krama ałkaholnaj pradukcyi pad brendam «Dub zialony». Miascovaja rajonnaja hazieta anansuje zapusk cełaj sietki ałkamarkietaŭ va ŭsioj Biełarusi. «Biuro» daviedałasia, što hety tavarny znak Zajcaŭ u lipieni 2023 hoda zarehistravaŭ na siabie asabista.
Sama krama ŭ Pružanach naležyć firmie «Hłauhandalpred» (zarehistravanaja ŭ takim napisańni).
Na jaje ž u sakaviku 2025 hoda byŭ zarehistravany jašče adzin ałkapunkt «Dub zialony» ŭ Pinsku.
51% «Hłauhandalpreda» znachodzicca va ŭłasnaści ŭ Alaksandra Zajcava. Adnak spojvać biełarusaŭ biznesoviec płanuje nie adzin, a ŭ kampanii Viktara Łukašenki — 49% firmy zapisanyja na Nacyjanalny alimpijski kamitet (NAK), jaki z 2021 hoda i ŭznačalvaje starejšy syn Alaksandra Łukašenki.
Praŭda, kolki partniory zarobiać na novaj ałkaholnaj sietcy, nieviadoma — usia buchhałtarskaja spravazdačnaść kampanii zasakrečanaja jak padatkovaja tajamnica zhodna z pastanovaj Savieta ministraŭ.
Akramia «Duba zialonaha», z 2021 hoda «Hłauhandalpred» taksama vałodaje supiermarkietam biaspošlinnaha handlu na aŭtamabilnym pamiežnym pierachodzie Bierastavica/Babroŭniki na miažy z Polščaj.