U Hiermanii asudžany nieanacyst źmianiŭ poł. Ciapier jaho pavinny adpravić u žanočuju turmu — niemcy ŭ šoku
U Niamieččynie pravy ekstremist, jaki byŭ asudžany za raspalvańnie nianaviści, źmianiŭ imia, sprabujučy damahčysia pieravodu ŭ žanočuju turmu. Ciapier u Hiermanii razharelisia sprečki, u jakoj turmie pavinna adbyvać pakarańnie transhiendarnaja ultrapravaja ekstremistka: u žanočaj ci ŭ mužčynskaj.
Pravy ekstremist Śvien Libich na akcyi, 2018 hod. Fota: Markus Heine / SOPA Images / LightRocket via Getty Images
U lipieni 2023 hoda Marła-Śvieńja Libich była asudžanaja rajonnym sudom u Hale (Saksonija-Anhalt) na hod i šeść miesiacaŭ pazbaŭleńnia voli biez mahčymaści ŭmoŭna-daterminovaha vyzvaleńnia za raspalvańnie varožaści, paklop i abrazy. Jana padała apielacyju, ale prajhrała.
Na toj momant jaje zvali Śvien Libich. U niamieckaj presie paviedamlałasia, što jon byŭ udzielnikam nieanacysckaj hrupoŭki Blood and Honour («Kroŭ i honar»).
U kancy 2024 hoda Libich źmianiŭ hiendarny markier u aficyjnych dakumientach z mužčynskaha na žanočy, a taksama imia. Padstavaj staŭ novy niamiecki zakon ab samavyznačeńni, što dazvalaje mianiać hiendar praz prostaje piśmovaje paviedamleńnie ŭ ZAHS, biez sudovaha pracesu.
Niamieckaja presa stavić pad sumnieŭ dobrasumlennaść hiendarnaha pierachodu Libich.
«Sumnieŭna, što heta surjozna, — piša Spiegel. — Na praciahu mnohich hadoŭ Libich była viadomaja svaimi pravymi ekstremisckimi pohladami i raniej vykazvałasia kvirafobna».
Libich padała skarhi na ŚMI, abvinavačvajučy presu ŭ skažeńni jaje hiendarnaj identyčnaści.
Skarha na Spiegel u Niamieckuju radu pa presie była adnahałosna adchilenaja jak nieabhruntavanaja. U rašeńni było skazana, što Libich «źmianiła hramadzianski status z metaj pravakacyi i dyskredytacyi dziaržavy».
Hałoŭny prakuror Hale Denis Čarnota paviedamiŭ hramadskamu viaščalniku MDR, što Libich budzie źmieščana ŭ žanočuju turmu ŭ Chiemnicy.
Libich paćvierdziła heta ŭ sacsietcy X: «Ja pačnu adbyvać termin pavodle hrafiku. 29 žniŭnia 2025 hoda ŭ 22:00 ja budu ŭ papraŭčaj ustanovie Chiemnica sa svaimi čamadanami».
Adnak rašeńnie, dzie kankretna Libich budzie adbyvać pakarańnie, pakul nie pryniataje. Pavodle prakurora, administracyja turmy vyznačyć, ci ŭjaŭlaje jana pahrozu biaśpiecy i paradku. U zaležnaści ad hetaha jaje mohuć pieravieści ŭ inšuju turmu.
Tym časam ŚMI paviedamlajuć, što niadaŭna Libich prajhrała jašče adnu sudovuju spravu — suprać žurnalista Julijana Rajchelta ŭ bierlinskim sudzie.
Rajchelt, hałoŭny redaktar vydańnia Nius, u lipieni napisaŭ u sacsietcy X:
«Kožny, chto sočyć za spravaj nieanacysta Śviena Libicha, moža zrabić tolki adzin vyvad: urad «śviatłafora» prymusiŭ usiu niamieckuju presu raspaŭsiudžvać niapraŭdu i rabić hratesknyja iłžyvyja zajavy. Śvien Libich — nie žančyna».