Rasijskija vajskoŭcy pad Dabrapollem ciapier sami apynulisia pad pahrozaj akružeńnia

Biahučuju situacyju na Danbasie praanalizavaŭ vajenny ahladalnik Ruskaj słužby Bi-bi-si Illa Abišaŭ.

Prykładna z tydzień tamu stała viadoma pra praryŭ rasijskich šturmavych častak u rajon horada Dabrapolle na poŭnač ad Pakroŭska. Paviedamlałasia pra davoli hłybokaje — da 10-12 km, pavodle niekatorych źviestak — da 15-18 km — uklińvańnie rasiejskich vojskaŭ va ŭkrainskuju abaronu i pahrozu ich dalejšaha prasoŭvańnia.

USU byli vymušanyja terminova reahavać na niebiaśpiečnuju situacyju. Na hety momant im udałosia spynić rasijskiaje nastupleńnie i adbić nasielenyja punkty pa linii Rubiežnaje — Załaty Kałodzieź — Viasiołaje, a taksama ŭklinicca ŭ asnovu rasijskaha vystupu i stvaryć sustrečnuju pahrozu akružeńnia ŭsioj hrupoŭki, jakaja prarvałasia.

Pavodle šerahu paviedamleńniaŭ, častka rasijskich padraździaleńniaŭ, jakija prasunulisia dalej za ŭsich na poŭnač, užo akazalisia adrezanymi ad asnoŭnych siłaŭ. Pra heta, u pryvatnaści, śviedčać karty ŭkrainskaha analityčnaha partała DeepState i rasijskaha Z-błohiera «Rybaria».

Na karcie Instytuta vyvučeńnia vajny (ISW) akružeńnie rasijskich čaściej nie paznačanaje, ale amierykanskija analityki taksama pišuć pra hetuju pahrozu. Ciapier abodva baki padciahvajuć reziervy, paviedamlajecca pra mocnyja bai.

Pavodle infarmacyi ŭkrainskaha vajskovaha ekśpierta Kanstancina Mašaŭca, rasijskija vojski sprabujuć debłakavać svaje pieradavyja padraździaleńni ŭdarami z pravaha fłanhu pamiž siołami Šachava i Novaje Šachava ŭ kirunku Kučaravaha Jara, dzie im udałosia prasunucca prykładna na paŭkiłamietra. Jany taksama praciahvajuć ataki na asnoŭnym učastku paŭnočnaha fłanhu nastupleńnia na Pakroŭsk — u kirunku siała Rodzinskaje.

«U svaju čarhu, USU praciahvajuć kontratakavać praciŭnika kala asnovy «harłaviny» jaho ŭklinieńnia, imknučysia całkam pierarezać samo ŭklinieńnie pa najbolš karotkim kirunku Nikanoraŭka — Majak, a taksama pastupova zvužajuć ahulnuju płošču ŭklinieńnia praciŭnika», — piša Mašaviec.

U cełym situacyja na hetym učastku frontu zastajecca składanaj i moža rezka źmianicca ŭ luby momant.

Kamientary da artykuła