U Mahiloŭskaj vobłaści žančyny trapili ŭ balnicu paśla padpolnych ukołaŭ pryhažości
Dziaržaŭny kamitet sudovych ekśpiertyz rasśleduje vypadki ŭskładnieńniaŭ paśla praviadzieńnia kaśmietałahičnych pracedur u chatnich umovach. Za apošni čas u viedamstva pastupiła niekalki materyjałaŭ ab niaŭdałych kaśmietyčnych umiašańniach.
Fota: vecteezy.com
Adna z paciarpiełych zrabiła injekcyi botaksu ŭ vobłaść tvaru i šyi ŭ majstra na damu. Praź niekalki dzion u žančyny źjaviłasia ciažkaść pry hłytańni, słabaść ciahlic, dryžyki i vyjaŭlenaja stomlenaść.
Pieršapačatkova jana sprabavała lačycca samastojna, ale stan pahoršyŭsia — uźnikli prablemy z dychańniem.
Žančynu špitalizavali z dyjahnazam «aciok Kvinkie», jana praviała bolš za dva tydni ŭ stacyjanary. Navat praz dva z pałovaj miesiacy jana praciahvała skardzicca na boli ŭ ciahlicach i mocnuju stomlenaść.
Z padobnymi simptomami da miedykaŭ źviarnułasia jašče adna žycharka rehijona. Paśla ŭkołaŭ u jaje raźviŭsia mocny aciok paviekaŭ, parušyŭsia zrok, źjavilisia hałavakružeńnie, aniamieńnie jazyka i ciažkaści z maŭleńniem.
Sudovyja ekśpierty adznačyli, što ŭ abodvuch vypadkach nazirałasia mijasteničnaja reakcyja — praźmiernaje pasłableńnie ciahlic. Adnak dakładnuju pryčynu ŭskładnieńniaŭ vyznačyć nie ŭdałosia. Jana mahła być vyklikana jak miedycynskimi pracedurami, tak i spadčynnymi, infiekcyjna-taksičnymi abo chraničnymi faktarami.
Pa faktach zdareńniaŭ viadziecca pravierka.