«Dzie ludzi?» Jak ułady pakinuli hamielčukoŭ biez Centralnaha plaža na cełaje leta
Homielskija ŭłady faktyčna pazbavili ŭ hetym kupalnym siezonie haradžan Centralnaha plaža — lubimaha miesca adpačynku. Usio leta, pavodle śviedčańniaŭ miascovych, hałoŭny plaž pustavaŭ — navat u śpiakotu. Pryčynaj staŭ zakryty piešachodny most praz Sož — asnoŭny šlach na plaž z centra Homiela, piša «Fłahštok».
Centralny plaž u śpiakotny dzień u červieni. Skrynšot videa
Ramont pryjšoŭsia akurat na plažny siezon, chacia raniej płanavałasia, što raboty zavieršacca ŭ siaredzinie leta — da piku adpačynkaŭ i taho času, kali vada ŭ Sožy prahrejecca.
Jak paviedamlaŭ «Fłahštok», spačatku mierkavałasia vykanać raboty ŭ pieršaj pałovie hoda. U źmianieńni da zadańnia na prajektavańnie (kastryčnik 2024 h.) terminy pačatku i zakančeńnia budaŭnictva byli paznačany jak studzień—červień 2025 hoda. U prajekcie pačatak rabot značyŭsia ŭ lutym, zakančeńnie — u lipieni.
Ale potym terminy zrušyli, ramont pačali tolki ŭ mai, a zaviaršeńnie pryznačyli na listapad.
Ułady zapuścili novy aŭtobusny maršrut da plaža ad płoščy Lenina, ale žadajučych dabiracca ŭ abjezd i za hrošy akazałasia mała. Arhanizavali i rejsy katera ad pryčała «Kijeŭski spusk» da druhoha bieraha pa 2 rubli ŭ adzin bok. Adnak i hety varyjant nie staŭ papularnym.
Centralny plaž u minułyja hady. Fota: «Sputnik»
Samyja śpiakotnyja dni leta ŭžo prajšli, ale i ŭ tyja ciopłyja dni, kali Centralny plaž moh by pryciahnuć sotni, jon zastavaŭsia paŭpustym.
Heta paćviardžajuć mnohija videa, jakija pahladzieŭ «Fłahštok» za červień, lipień i žnivień. Naprykład, soniečnym viečaram 11 lipienia, kali tempieratura vady ŭ Sožy dasiahała 24 hradusy, plaž byŭ amal pusty.
«Dzie ludzi?» — spytali ŭ kamientaryjach.
«Idzie ramont mosta praz raku, i na plaž treba z centra padjazdžać na mašynie ci aŭtobusie. Plažaŭ u horadzie šmat. Vidać, ludzi na inšych», — adkazaŭ karystalnik.
Centralny plaž u śpiakotny dzień u žniŭni. Skrynšot videa
Apošniuju śpiakotnuju subotu, 16 žniŭnia, Centralny plaž taksama zastavaŭsia paŭpustym, što vidać na adnym z rolikaŭ.