Kreml: Padpisańnia dakumientaŭ pa vynikach pieramoŭ Pucina i Trampa nie płanujecca

Pres-sakratar prezidenta Rasii Dźmitryj Piaskoŭ zajaviŭ, što nijakaj padrychtoŭki aficyjnych rašeńniaŭ pa vynikach sustrečy prezidentaŭ Rasii i ZŠA Uładzimira Pucina i Donalda Trampa ŭ Ankorydžy na Alascy nie viałosia, i nie varta sprabavać pradkazvać vyniki sustrečy.

Dźmitryj Piaskoŭ i Uładzimir Pucin. Fota: Sputnik, Kremlin Pool Photo via AP

Pry hetym Piaskoŭ dadaŭ, što na sumiesnaj pres-kanfierencyi z Trampam Pucin, vierahodna, zrobić zajavu pra dasiahnutyja damoŭlenaści.

«Uličvajučy, što budzie sumiesnaja pres-kanfierencyja, prezident, viadoma ž, akreślić toje koła damoŭlenaściaŭ, razumieńniaŭ, jakija ŭdasca dasiahnuć», — dadaŭ pradstaŭnik Kramla.

Rasijski ŭradavy samalot ŭžo prylacieŭ na Alasku. Jon vylecieŭ z Maskvy ranicaj i nieŭzabavie pryziamliŭsia na vajskova-pavietranaj bazie Ełmiendorf u Ankorydžy. Na borcie była rasijskaja delehacyja dla padrychtoŭki sustrečy.

Sam ža Pucin, jak zajaviŭ Dźmitryj Piaskoŭ, pa darozie na Alasku źbirajecca jašče naviedać adzin z rasijskich rehijonaŭ.

U svaju čarhu, Donald Tramp u intervju Fox News zajaviŭ, što, na jaho dumku, Pucin moža zaklučyć pahadnieńnie, i što pahroza sankcyj suprać Rasii mahła paŭpłyvać na arhanizacyju sustrečy. Jon taksama padkreśliŭ, što ekanamičnyja stymuły i sankcyi vielmi mocnyja, ale nie raskryŭ padrabiaznaściaŭ.

Prezident ZŠA dadaŭ, što paśla sustrečy jon patelefanuje prezidentu Ukrainy Uładzimiru Zialenskamu i jeŭrapiejskim lidaram, ale kali sustreča budzie biezvynikovaj, to nikomu telefanavać nie budzie.

Raniej pres-sakratarka Trampa Kerałajn Livit zajaviła, što ŭ ZŠA jość šmat instrumientaŭ dla spynieńnia vajny. Tramp papiaredziŭ pra «surjoznyja nastupstvach», kali Pucin nie pahodzicca na mir va Ukrainie, majučy na ŭvazie ekanamičnyja sankcyi ŭ vypadku niaŭdałaha vyniku sustrečy.

Kamientary da artykuła