«Ja paabiacaŭ kamitetčykam». Juraś Ziankovič płanuje adsudzić hrošy ŭ siłavikoŭ
Były palitviazień Juraś Ziankovič u efiry «Biełsatu» zajaviŭ, što budzie namahacca pryciahnuć da adkaznaści siłavikoŭ, jakija jaho katavali za kratami. Palityk i praŭnik płanuje padać isk u amierykanski sud.
Skrynšot videa Biełsat
Były palitviazień Juraś Ziankovič u efiry «Biełsata» zajaviŭ, što budzie namahacca pryciahnuć da adkaznaści siłavikoŭ, jakija jaho katavali za kratami. Palityk i juryst płanuje padać isk u amierykanski sud.
Jon rastłumačyŭ, što amierykanskija zakony dazvalajuć asobie, jakaja zaznała katavańni, padać zajavu ŭ sud u ZŠA. Takim čynam možna pasprabavać pryciahnuć da adkaznaści jak dziaržavu, kali idziecca pra złačynstva suprać čałaviečnaści, hetak i kankretnych ludziej. Pavodle byłoha palitviaźnia, sprava, jakuju jon inicyjuje, adroźnivajecca ad tych razboraŭ, što ładziać u krainach ES:
«Toje, što adbyvajecca ŭ Jeŭropie, — heta kryminalna-pravavoje pakarańnie. Ale jość jašče cyvilna-pravavaja adkaznaść, kali kankretnyja ludzi pavinny nie ŭ turmie siadzieć, a zapłacić za toje, što jany zrabili. Kankretna ŭ hetaj spravie ja budu patrabavać, kab zapłacili mnie. I kali ja prajdu hety šlach, luby inšy były palitviazień zmoža paŭtaryć hety šlach. Navat kali jon nie hramadzianin ZŠA, amierykanskaje zakanadaŭstva heta dazvalaje».
Ziankovič — amierykanski juryst i biełaruski aktyvist. Jon byŭ aryštavany ŭ Maskvie ŭ 2021 hodzie pavodle abvinavačvańnia ŭ zamachu na Łukašenku i dastaŭleny ŭ Miensk. Jaho pakarali ŭ miežach «spravy zmoŭcaŭ» pavodle šerahu kryminalnych artykułaŭ 11 hadami kałonii va ŭmovach uzmocnienaha režymu.
U hetaj spravie prachodzili taksama litaraturaznaŭca i palitołah Alaksandr Fiaduta, staršynia Partyi BNF Ryhor Kastusioŭ — kožnamu ź ich prysudzili 10 hadoŭ. U sudzie Fiadutu, Kastusiova i Ziankoviča nazvali vinavatymi ŭ zmovie z metaju zachapić dziaržaŭnuju ŭładu niekanstytucyjnym šlacham. Pravaabaroncy pryznali ich palityčnymi źniavolenymi.
Ziankoviča vyzvalili 30 krasavika ŭ vyniku pieramovaŭ amierykancaŭ z Łukašenkam.