Tejłar Śvift abviaściła pra vychad novaha alboma

Tejłar Śvift abviaściła pra svoj 12-y studyjny albom The Life of a Showgirl, vyklikaŭšy burnaje abmierkavańnie siarod fanataŭ. Pierad aficyjnym anonsam u siecivie źjaviłasia 12 zdymkaŭ z namiokam na «nastupnuju eru», na sajcie śpiavački zapuścili zvarotny adlik, a navina prahučała ŭ padkaście jaje chłopca, futbalista Trevisa Kiełsi, piša Bi-bi-si.

Tejłar Śvift. Fota: AP Photo/Natacha Pisarenko

Albom užo dastupny dla pieradzakazu, ale dakładnaja data relizu pakul nie nazvanaja.

Papiaredni albom The Tortured Poets Department (2024) pabiŭ rekord Spotify pa kolkaści prasłuchoŭvańniaŭ za sutki. Tejłar Śvift časta źviartajecca ŭ tvorčaści da temy adnosin, i krytyki miarkujuć, što hetaja tema zachavajecca i ŭ novym relizie.

Pozna ŭviečary ŭ paniadziełak na aficyjnym sajcie Tejłar Śvift źjaviŭsia zvarotny adlik

Paśla hučnaha Eras Tour (149 kancertaŭ u 53 haradach, kala 1,2 miljona hledačoŭ tolki ŭ Vialikabrytanii i kala 1 miljarda funtaŭ układu ŭ ekanomiku) Śvift stała miljarderkaj i zamacavała status suśvietnaj supierzorki. Jana atrymała 14 «Hremi», u tym liku 4 razy za «Albom hoda», źjaŭlajecca rekardsmienkaj MTV VMA i artystkaj dziesiacihodździa pavodle American Music Awards.

Krytyki adznačajuć, što pavarotnym momantam u jaje karjery stali albomy Folklore i Evermore, jakija prynieśli joj novuju aŭdytoryju i pryznańnie navat siarod tych, kamu raniej nie padabalisia jaje kantry i pop. Prajekt pa pierazapisie pieršych šaści albomaŭ (Taylor's Versions) daŭ druhoje žyćcio starym chitam i ŭmacavaŭ kantrol Śvift nad plonam ułasnaj tvorčaści.

Pavodle mierkavańnia kaleh i muzyčnych ahladalnikaŭ, sakret pośpiechu Śvift — u spałučeńni talentu, pracavitaści, stratehičnaha myśleńnia i nievierahodnaj matyvacyi dasiahnuć pastaŭlenych met. 

Kamientary da artykuła