Ihar Słučak źbiŭ Alesia Pileckaha. Spravaj zajmajecca palicyja
Nivodzin z bakoŭ nie choča kamientavać situacyju.
Ihar Słučak
Bojka pamiž papularyzataram biełaruskaj movy Iharam Słučakam i žurnalistam «Radyjo Svaboda» Alesiem Pileckim adbyłasia ŭ Vilni ranicaj 3 žniŭnia.
Pra kanflikt napisała ŭ fejsbuku Alina Nahornaja — suzasnavalnica biełaruskaj prastory «Zołak» i aŭtarka knihi «Mova 404» pra dyskryminacyju biełaruskaj movy. Jany ź Iharam Słučakom majuć dvuch dziaciej. Apošnim časam jany žyvuć paasobku, ale razam hadujuć dziaciej.
Alina Nahornaja i Ihar Słučak. Fota: fejsbuk Aliny Nahornaj
Nahornaja raskazała, što Słučak u jaje kvatery biŭ čałavieka pa hałavie nahami ŭ botach i šklanoj butelkaj, ale nie paviedamiła, chto byŭ achviaraj.
Imia Alesia Pileckaha — viadomaha žurnalista «Radyjo Svaboda» i aŭtara papularnaha cykła fejsbuk-dopisaŭ «Davaj, paka» — nazvaŭ sam Słučak.
Aleś Pilecki. Skrynšot: «Radyjo Svaboda»
Jak vynikaje z dopisu Słučaka, jon byŭ niepryjemna ŭražany, kali ŭbačyŭ Pileckaha razam z Nahornaj.
«Kamunikacyja pamiž nami była takaja, što paśla majho vizitu jany dvoje vypravilisia ŭ palicyju i napisali na mianie zajavu», — pryznaŭ moŭny aktyvist, nie ŭdakładniajučy abstaviny.
Internet-supolnaść, chutčej, stała na bok Nahornaj — jaje dva dopisy pa temie sabrali 390 i 190 łajkaŭ adpaviedna (druhi dopis tut). Post Słučaka ź jaho tłumačeńniami nabraŭ 120 łajkaŭ.
Usie troje ŭdzielnikaŭ kanfliktu, da jakich źviarnułasia «Naša Niva», nie stali dadatkova kamientavać situcyju. Nahornaja i Słučak vyrašyli nie rabić heta publična, Pilecki nie pračytaŭ paviedamleńnie z prośbaj ab kamientary.
Padobnyja historyi mohuć vyrašacca albo ŭ kryminalnym, albo ŭ hramadzianskim pracesie. Miarkujučy pa kantekście, Pilecki i Nahornaja pasprabavali pajści pa šlachu kryminalnaha pieraśledu Słučaka.
U zaležnaści ad ciažkaści paškodžańniaŭ za źbićcio čałavieka ahresaru moža pahražać pa litoŭskim zakanadaŭstvie ad štrafu i prymusovych prac da realnaha źniavoleńnia.