Ekanamist Kruk: Žyć dalej spadziavańniami 2020-ha — infantylna
Ekanamist Źmicier Kruk na kanfierencyi «Novaja Biełaruś» u Varšavie vykazaŭ svajo bačańnie, što musić stać stratehičnaj zadačaj dla Biełarusi.
«My stracili mahčymaść hladzieć na Biełaruś jak samastojny siužet, dzie dabro suprać zła. Što ja maju na ŭvazie? U 2020 hodzie my ŭsprymali heta jak dosyć prostuju historyju, dzie dyktatura suprać demakratyi, suprać svabody. Što źmianiłasia dalej, heta nie zusim zaležyć ad nas — my stali častkaj bolš šyrokaha scenara, źviazanaha z upłyvam Rasii».
Źmicier Kruk zhadvaje, što jamu ŭ 2020 hodzie spadabalisia słovy adnaho biełaruskaha fiłosafa: «Biełaruski narod admianiŭ hieapalityčnuju dyskusiju».
«Nam tady padavałasia, što my možam adasobicca ad kantekstu, bolš ciažkaha kantekstu, i kazać, što heta, nasamreč, prosta aksamitnaja revalucyja», — dzielicca jon.
Ekanamist raskazvaje taksama pra svaju razmovu ŭ kastryčniku 2020 hoda ź Ivanam Mikłašam, byłym ministram finansaŭ Słavakii.
«Ja sprabavaŭ raźvivać hety tezis, što biełaruskaja historyja — heta historyja vyklučna ŭnutranaja, heta patreba i žadańnie narodu da svabody. Na što Ivan Mikłaš mnie adkazaŭ u efiry [jutuba] bolš dypłamatyčna, što vy niedaaceńvajecie rolu, udzieł i ŭpłyŭ Rasii.
Paśla efiru spadar Mikłaš mnie bolš ščyra skazaŭ: «Heta peŭny infantylizm. Vy chočacie, i ja dobra razumieju, adasobicca, vam tak praściej, i heta dla ŭnutranaj historyi praściej nie zaŭvažać tyja faktary, jakija jość. Ale chutčej za ŭsio, vy pamylajeciesia».
Siońnia, na žal, ja vymušany skazać, što spadar Mikłaš mieŭ racyju. Toje, što my ŭsie pabačyli paśla 2022 hoda — toje, što my stali tolki častkaj bolš šyrokaha siužeta».
«Kali my raniej kazali, što źmianić uładu ŭ Biełarusi mahčyma ŭnutranymi vysiłkami, siońnia heta daloka nie fakt, — razvažaje Kruk. — Mnie samamu padajecca, što scenar demakratyzacyi Biełarusi jak udar pa Rasii — heta kłasny scenar. Ale, na žal, najbolš realistyčna vyhladaje scenar stratehičnaj parazy ci značnaha asłableńnia Rasii i paśla hetaha źmieny ŭ Biełarusi».
Siońnia Biełaruś — zakładnica rasijskaj palityki, adznačaje Kruk. Stratehičnaj zadačaj jon bačyć vyciahnuć Biełaruś ź śfiery ŭpłyvu Rasii.
Kažučy pra toje, što biełarusy nabyli paśla 2020-ha, Źmicier Kruk nazyvaje staleńnie nacyi, i heta važny zdabytak.
«Pry hetym ja adzin z tych, chto kaža, što treba pierastać žyć u 2020 hodzie i pierajści ŭ 2025-ty. Što ja maju na ŭvazie? Ni ŭ jakim razie nie toje, što treba admovicca ad spadčyny 2020 hoda. Jakraz-taki naadvarot. Spadčyna 2020 hoda — heta najvialikšy simvał, heta vielmi važnaje histaryčnaje značeńnie. I ja jakraz-taki kazaŭ by ab tym, što jaho treba kapitalizavać. Stvaryć jaho mif, simvał. I hety mif, simvał, jon nie mienšy, čym 25 sakavika 1918 hoda.
Toje, što było ŭ 2020 hodzie — heta adno z najvialikšych dasiahnieńniaŭ biełaruskaha hramadstva. (…) Ale treba ruchacca dalej i sychodzić, mahčyma, ad tych troški infantylnych adčuvańniaŭ maładości, jakija byli ŭ 2020 hodzie, i bolš realistyčna hladzieć na situacyju, jakaja, na žal, siońnia horš vyhladaje».