Alijeŭ i Pašynian padpisali ŭ Biełym domie dekłaracyju ab spynieńni bajavych dziejańniaŭ

Prezident Azierbajdžana Ilcham Alijeŭ i premjer-ministr Armienii Nikoł Pašynian u prysutnaści prezidenta ZŠA Donalda Trampa padpisali ŭ Biełym domie dekłaracyju ab poŭnym spynieńni bajavych dziejańniaŭ. Pavodle słoŭ Trampa, baki damovilisia nazaŭždy spynić uzbrojeny kanflikt, adnavić handal, padarožžy i dypłamatyčnyja adnosiny, a taksama pryznavać suvierenitet i terytaryjalnuju cełasnaść adzin adnaho, pieradaje Reuters.

Ilcham Alijeŭ, Donald Tramp i Nikoł Pašynian. Fota: Andrew Harnik/Getty Images

ZŠA płanujuć padpisać ź Jerevanam i Baku asobnyja pahadnieńni ab pašyreńni supracoŭnictva ŭ enierhietycy, handli i vysokich technałohijach, a taksama źniać abmiežavańni na ŭzajemadziejańnie ŭ śfiery abarony z Azierbajdžanam. Amierykanskija kampanii hatovyja inviestavać u infrastrukturu abiedźviuch krain.

Alijeŭ nazvaŭ damoŭlenaści mahčymaściu «pieraharnuć staronku supraćstajańnia i kryvi» i zabiaśpiečyć mirnuju budučyniu. Pašynian padkreśliŭ, što heta adkryvaje šlach da miru, biaśpieki i ekanamičnaha raźvićcia na Paŭdniovym Kaŭkazie.

Pry hetym zastajecca niavyśvietlenym, jak pahadnieńnie vyrašyć hałoŭnyja sprečnyja pytańni — naprykład, delimitacyju miažy i patrabavańnie Baku źmianić Kanstytucyju Armienii, dzie ŭsio jašče jość zaklik 1989 hoda ab abjadnańni z Nahornym Karabacham.

Asobny punkt dakumienta daje Vašynhtonu vyklučnyja pravy na raźvićcio tranzitnaha kalidora praz Paŭdniovy Kaŭkaz. Jon pavinien złučyć paŭdniovy zachad Azierbajdžana ź jaho ekskłavam Nachičevańniu praz horad Miehry ŭ Siunikskaj vobłaści Armienii i vyjści da miažy z Turcyjaj.

Hety prajekt, jaki atrymaŭ nazvu TRIPP («Maršrut Trampa dziela mižnarodnaha miru i roskvitu»), budzie dziejničać u ramkach armianskaha zakanadaŭstva, ale ZŠA atrymajuć mahčymaść pryciahnuć mižnarodnych partnioraŭ dla budaŭnictva i kiravańnia infrastrukturaj. Pavodle krynic Reuters, kalidor moža adkryć rehijon dla novych ekanamičnych suviaziaŭ i źmienšyć ryzyku adnaŭleńnia kanfliktu.

Kamientary da artykuła