U Baraŭlanach dziaŭčynka atruciłasia hazam paśla zamieny ličylnika
U pasiołku Baraŭlany Minskaha rajona trochhadovaja dziaŭčynka atruciłasia pryrodnym hazam. Jaje ŭ ciažkim stanie dastavili ŭ reanimacyju dziciačaj abłasnoj balnicy.
Fota ilustracyjnaje
Jak paviedamlaje Śledčy kamitet, napiaredadni ranicaj u kvatery siamji pravodziłasia zamiena hazavaha ličylnika. Uviečary, kali baćki viarnulisia dadomu, baćka adčuŭ mocny pach hazu i vyklikaŭ avaryjnuju hazavuju słužbu. Śpiecyjalisty vyjavili ŭciečku hazu nad i pad novym ličylnikam i nieadkładna adramantavali paškodžańnie.
Na nastupnuju ranicu maci zaŭvažyła, što dzicia vyhladaje słabym i viałym i adrazu źviarnułasia pa miedycynskuju dapamohu.
Ciapier pa hetym fakcie pravodzicca pravierka.
Pry vykarystańni hazavaha abstalavańnia važna zachoŭvać praviły biaśpieki. Rabić zamienu i ramont pavinny tolki kvalifikavanyja śpiecyjalisty. Varta taksama rehularna absłuhoŭvać hazavyja prybory, pastavić datčyki ŭciečki hazu, praviarać pracu vientylacyi, a pry pieršym pachu hazu — pierakryvać padaču, adkryvać vokny i vyklikać avaryjnuju słužbu.
Taksama važna sačyć za samaadčuvańniem — hałaŭny bol, młosnaść, słabaść mohuć być prykmietami atručvańnia.