Rubia: Klučavym elemientam zakančeńnia vajny RF suprać Ukrainy budzie pytańnie terytoryj
«U lubym pahadnieńni pavinny być sastupki; sastupki pavinny być z boku Rasii i, viadoma, z boku Ukrainy. Heta składana..», — skazaŭ dziaržsakratar ZŠA.
Marka Rubia. Fota: Saul Loeb, Pool Photo via AP
Dziaržsakratar ZŠA Marka Rubia zajaviŭ, što klučavym elemientam zakančeńnia raźviazanaj RF vajny suprać Ukrainy stanie terytaryjalnaje pytańnie. Pra heta jon skazaŭ u intervju telekanału Fox Business, piša «Jeŭrapiejskaja praŭda».
Rubia dadaŭ, što častkaj mirnaha pracesu pavinna stać spynieńnie ahniu, pakolki, pa jaho słovach, «ciažka vieści pieramovy pra detali kančatkovaha mirnaha pahadnieńnia, kali vy stralajecie adzin u adnaho».
Tamu, jak pierakanany dziaržsakratar, u ideale nieabchodna «pierajści da karotkaterminovaha spynieńnia ahniu i vykarystać hety čas dla kančatkovaha ŭrehulavańnia kanfliktu». Pry hetym jon ličyć, što «napieradzie doŭhi šlach, kab zrazumieć, jak skončyć vajnu».
Adnačasova Rubia raspavioŭ, što «klučavymi elemientami luboha zakančeńnia vajny buduć terytaryjalnyja pytańni».
«U lubym pahadnieńni pavinny być sastupki; sastupki pavinny być z boku Rasii i, viadoma, z boku Ukrainy. Heta składana… Ja dumaju, što ŭmovy, na jakich jana pavinna skončycca, — heta zaŭsiody składanaja častka», — adznačyŭ jon.
Pry hetym, pa słovach Rubia, u ZŠA ciapier lepš razumiejuć umovy, «na jakich Rasija budzie hatovaja skončyć vajnu».
«Ciapier my pavinny paraŭnać heta z tym, što hatovyja pryniać ukraincy i našy jeŭrapiejskija sajuźniki, ale, viadoma, u pieršuju čarhu — ukraincy», — dadaŭ dziaržsakratar.
Jon padkreśliŭ, što ŭpieršyniu z pačatku pracy administracyi Donalda Trampa «my majem kankretnyja prykłady taho, čaho moža patrabavać Rasija, kab skončyć vajnu».
Nahadajem, 6 žniŭnia adbyłasia sustreča pasłańnika prezidenta ZŠA Styva Uitkafa i haspadara Kramla Uładzimira Pucina.
U Kramli zajavili, što padčas razmovy adbyŭsia abmien «peŭnymi sihnałami» adnosna rasijska-ukrainskaj vajny.
A Donald Tramp nazvaŭ sustreču «vielmi praduktyŭnaj» i biez detalaŭ paviedamiŭ, što «byŭ dasiahnuty značny prahres».
Čytajcie taksama:
Kamanda Trampa ŭžo pačała płanavać sustreču prezidenta ZŠA z Pucinym
Bieły dom: Sustreču Trampa i Pucina prapanavaŭ rasijski bok
Sustreča Trampa i Pucina budzie, ale nie fakt, što na nastupnym tydni