U Barsiełonie baćki pakinuli 10-hadovaje dzicia ŭ aeraporcie, kab nie prapali kvitki i adpačynak

U Ispanii, u barsiełonskim aeraporcie El-Prat, razhareŭsia skandał: baćki pakinuli svajho 10-hadovaha syna adnaho ŭ terminale, kab nie mianiać svaich raniejšych płanaŭ, piša Euronews.

Barsiełonski aeraport El-Prat. Zdymak ilustracyjny. Fota: bbcairport.com 

Jak paviedamlajecca, siamja płanavała vylecieć na adpačynak, ale ŭ dziciaci nie było patrebnaj vizy, niahledziačy na toje, što jaho ispanski pašpart byŭ sapraŭdny. Heta aznačała, što dzicia nie mahło sieści ŭ samalot.

Kab nie stracić kvitki i nie admianiać adpačynak, baćki pryniali rašeńnie pakinuć chłopčyka adnaho ŭ aeraporcie i paprasili adnaho sa svajakoŭ pryjechać i zabrać jaho. Jany pajšli da svajho hiejta, pakinuŭšy syna biez nahladu.

Hetuju situacyju apubličyła kaardynatarka avijakampanii, jakaja apublikavała videa na tyktoku:

«Ja bačyła šmat, ale takoje — prosta siurrealizm», — skazała jana.

Paśla taho jak praz hučnahavaryciel supracoŭniki biaśpieki aeraporta niekalki razoŭ sprabavali adšukać tych, chto apiakujecca dziciom, i nichto nie adhuknuŭsia, pra zdareńnie paviedamili palicyi. U vyniku baćkoŭ, a taksama ich druhoje dzicia, zatrymali i dastavili ŭ zonu prybyćcia, dzie znachodziŭsia chłopčyk.

Pavodle kaardynatarki avijakampanii, baćki nie ličyli svajo dziejańnie prablemaj i pavodzili siabie tak, byccam usia heta situacyja całkam narmalnaja. Ale ni supracoŭniki aeraporta, ni palicyja nie padzialali takuju pazicyju.

Kamientary da artykuła