U Šviejcaryi zaŭvažyli cełuju hrupu turystaŭ u nacysckaj formie
25 mužčyn z roznych krain Jeŭropy, a taksama z ZŠA, zajmalisia chajkinham u formie viermachta ŭzoru 1939 hoda, piša Blick.
Ilustracyjnaje fota: Jamey Keaten / AP
Palicyja kantona Biern pravieryła hrupu z 25 mužčyn u formie viermachta, jakaja pierasiakała masiŭ Vildchorn. Palicyjanty zapatrabavali, kab jany źniali nacysckuju simvoliku.
Miascovyja žychary zaŭvažyli hrupu ŭ niezvyčajnym adzieńni jašče ŭ piatnicu.
«Hrupa składałasia z pryblizna 25 čałaviek z roznych jeŭrapiejskich krain, a taksama z ZŠA», — raskazali ŭ palicyi. Siłaviki paprasili turystaŭ źniać kurtki z nacysckaj simvolikaj, kab paźbiehnuć mahčymych sutyknieńniaŭ ź inšymi ludźmi.
Udzielnikaŭ dapytali i zapisali ich danyja, ale nijakich jurydyčnych nastupstvaŭ heta nie mieła, pakolki ŭ Šviejcaryi našeńnie nacysckaj simvoliki pakul nie zabaroniena.
Pa raskazach vidavočcaŭ, hrupa sabrałasia na nievialikim kiempinhu kala vadaspadaŭ Zimien u kamunie Lenk. Pieršym na stajanku prybyŭ dom na kołach z Danii.
«Mužčyna nasiŭ vusiki nad vierchniaj huboj i staraśvieckuju bavaŭnianuju furažku», — raskazaŭ vidavočca. Jon pryjechaŭ nie adzin: ź im byli žančyna, dzicia i pažyłaja žančyna. Datčanin, vierahodna, byŭ kiraŭnikom hrupy.
Na nastupny dzień pačali prybyvać mašyny z roznych krain, u tym liku sa Šviejcaryi, naprykład, z kantona Vo. Potym udzielniki hrupy pačali abmieńvacca adzieńniem. U vyniku turysty apranulisia ŭ vajskovuju formu viermachta ŭzoru 1939 hoda. Na niekatorych mundzirach byli svastyki i inšyja nacysckija simvały.
Na sajcie hrupy mužčyny apisvajuć siabie jak «apalityčnych». Udzielniki prybyvajuć z ZŠA i šerahu jeŭrapiejskich krain, jany aktyŭnyja z 2009 hoda. Asablivuju ŭvahu jany nadajuć aŭtentyčnaści formy, jakaja, pavodle ich słoŭ, pavinna adpaviadać standartam «hornaj škoły armii» 1939 hoda. Na sajcie raźmieščany PDF-fajł z 20 staronak z padrabiaznym apisańniem pravił našeńnia formy, uklučajučy instrukcyi pa naniasieńni svastyki.
Bolšaść partyj, kantonaŭ i hramadskich arhanizacyj u Šviejcaryi vystupajuć za zabaronu vykarystańnia i raspaŭsiudžvańnia nacysckaj simvoliki ŭ hramadskich miescach. Hramadskaje abmierkavańnie adpaviednaha zakona, prapanavanaha Fiederalnaj radaj, zaviaršyłasia ŭ sakaviku hetaha hoda. Parušeńnie praduhledžvajecca karać štrafam pamieram u 200 frankaŭ (251 dołar).
Fiederalnaja rada choča zabaranić nie tolki svastyku, pryvitańnie «Chajl Hitler» i runy SS, ale taksama ličbavyja kody kštałtu «18» i «88», jakija traktujucca jak «Adolf Hitler» i «Chajl Hitler». Kantekst budzie vyznačalnym pry acency, ci ličycca simvolika kryminalna karanaj.