Mierc: Mahčymaściaŭ dla dypłamatyčnaha ŭrehulavańnia va Ukrainie bolš niama

Fiederalny kancler Hiermanii Frydrych Mierc zajaviŭ padčas vystupleńnia ŭ Bundestahu, što dypłamatyčnyja šlachi vyrašeńnia kanfliktu va Ukrainie vyčarpanyja. Jon rezka asudziŭ čarhovuju rakietnuju ataku Rasii, jakaja stała najbujniejšaj z pačatku poŭnamaštabnaha ŭvarvańnia, i nazvaŭ režym Pucina złačynnym.

Frydrych Mierc. Fota: Pierre Crom/Getty Images

Pry hetym Mierc padkreśliŭ, što Hiermanija praciahnie padtrymlivać Ukrainu.

U červieni ministr abarony Hiermanii Barys Pistoryus paviedamiŭ, što ŭ 2025 hodzie płanujecca vydzielić Ukrainie jašče 1,9 miljarda jeŭra, hałoŭnym čynam na vytvorčaść dalnabojnaj zbroi. Usiaho Bierlin nakiruje Kijevu 9 miljardaŭ jeŭra vajskovaj dapamohi.

U pačatku lipienia Mierc nie vyklučyŭ mahčymaść pastavak Ukrainie rakiet Taurus, zdolnych dalacieć da Maskvy, ale adznačyŭ, što dla ich efiektyŭnaha vykarystańnia patrebna jak minimum paŭhoda navučańnia.

Hiermanija — druhi najbujniejšy donar Ukrainy paśla ZŠA. Z 2022 hoda kraina vydzieliła ŭžo 44 miljarda jeŭra na vajskovuju, finansavuju i humanitarnuju dapamohu. Ukrainskaja armija atrymała ad Hiermanii sistemy SPA IRIS-T i Patriot, tanki Leopard, bronietechniku i bojeprypasy.

Na apošnim pasiadžeńni farmatu «Ramštajn» byŭ zaćvierdžany novy pakiet dapamohi na 5 miljardaŭ jeŭra, jaki praduhledžvaje vytvorčaść zbroi i bieśpiłotnikaŭ va Ukrainie, pieradaču sistem SPA i apłatu pasłuh spadarožnikavaha internetu Starlink. Mierc nazvaŭ heta pačatkam novaha etapu vajskova-pramysłovaha supracoŭnictva. Jon dadaŭ, što stvoranaja zbroja nie budzie mieć abmiežavańniaŭ na ŭdary pa terytoryi Rasii.

Mierc taksama zajaviŭ, što choča pieratvaryć Bundeśvier u najmacniejšuju armiju Jeŭropy, kab supraćstajać rasijskaj pahrozie. 

Kamientary da artykuła