Fejkavaja žurnalistka «Novaja hazieta Jeŭropa» sprabavała ŭziać intervju ŭ Paŭła Łatuški
19 červienia pres‑słužba Narodnaha antykryzisnaha ŭpraŭleńnia atrymała zapyt na intervju ŭ Paŭła Łatuški ad čałavieka, jaki pradstaviŭsia žurnalistkaj vydańnia «Novaja hazieta Jeŭropa» Irynaj Harynaj.
U zapycie prapanoŭvaŭsia ŭdzieł u zdymkach poŭnamietražnaha dakumientalnaha filma pra supraciŭ Jeŭropy ahresii z boku Rasii i Biełarusi, paviedamlaje pres-słužba palityka.
Paśla prapanovy pres‑słužby NAU pierajści ŭ miesiendžar dla vieryfikacyi i dalejšaj kamunikacyi, čałaviek, jaki pisaŭ z adrasu garinairinaeurope75@gmail.com, spyniŭ kamunikacyju.
Jak udałosia vyśvietlić, žurnalistka z takim imiem sapraŭdy pracuje ŭ «Novaja hazieta Jeŭropa», adnak jana nijakich zapytaŭ na intervju z Paŭłam Łatuškam i zdymki filma nie nakiroŭvała.
Bolš za toje, u Facebook vyjaŭleny fejkavy akaŭnt žurnalistki Iryny Harynaj, stvorany jašče ŭ 2022 hodzie. Pieršaja publikacyja na hetaj staroncy datavana śniežniem 2022 hoda, što moža śviedčyć pra metanakiravanuju i zahadzia spłanavanuju apieracyju — vierahodna, z boku śpiecsłužbaŭ.
Admietna, što napiaredadni ŭ Ofis Śviatłany Cichanoŭskaj taksama prychodzili nieviadomyja, što pradstavilisia žurnalistami taho ž vydańnia i adsyłali anałahičny zapyt z taho ž adrasu elektronnaj pošty, što i ŭ adras NAU. Jak vyśvietliła «Lusterka», jany byli naniaty praz Telegram ananimnymi zakazčykami nibyta dla intervju sa Śviatłanaj Cichanoŭskaj.
Dziejańni fejkavych žurnalistaŭ, takich jak nibyta Iryna Haryna, — heta nie paasobnyja pravakacyi, a častka adładžanaj sistemy hibrydnych apieracyj śpiecsłužbaŭ, zaznačajecca ŭ telehram-kanale palityka.