Machlar pry dapamozie ŠI vydaŭ siabie za Marka Rubia i źviazaŭsia z tryma ministrami zamiežnych spraŭ

Nieviadomy pierapisvaŭsia ŭ Signal i prysyłaŭ hałasavyja paviedamleńni, stvoranyja z dapamohaj niejrasietak, daviedałasia The Washington Post.

Marka Rubia. Fota: Saul Loeb, Pool Photo via AP

Machlar vydavaŭ siabie za dziaržsakratara ZŠA Marka Rubia i źviazaŭsia ź ministrami zamiežnych spraŭ, a taksama hubiernataram adnaho sa štataŭ ZŠA i členam Kanhresa.

Nieviadomy rassyłaŭ hałasavyja i tekstavyja paviedamleńni, imitavanyja z dapamohaj niejrasietak, jakija ŭznaŭlali hołas i styl piśma Rubia.

Amierykanskija ŭłady pakul nie vyśvietliili, chto staić za hetaj atakaj. Siłaviki ličać, što złamyśnik sprabavaŭ manipulavać vysokapastaŭlenymi čynoŭnikami «z metaj atrymańnia dostupu da infarmacyi abo akaŭntaŭ», havorycca ŭ depiešy, nakiravanaj ofisam Rubia supracoŭnikam Dziarždepartamienta.

Nieviadomy vykarystoŭvaŭ jak tekstavyja paviedamleńni, tak i zašyfravany dadatak Signal, jaki aktyŭna vykarystoŭvajecca administracyjaj Trampa. Zhodna z depiešaj ad 3 lipienia, jon «źviazaŭsia jak minimum ź piaćciu asobami, jakija nie ŭvachodziać u strukturu Dziarždepartamienta, uklučajučy troch ministraŭ zamiežnych spraŭ, adnaho hubiernatara i adnaho člena Kanhresa ZŠA».

Kampanija pa padrobcy pačałasia ŭ siaredzinie červienia, kali machlar stvaryŭ akaŭnt u Signal ź imieniem «Marco.Rubio@state.gov» i pačaŭ kantaktavać z dypłamatami i palitykami, jakija ničoha nie padazravali — jak zamiežnymi, tak i amierykanskimi. Heta imia nie źjaŭlajecca jaho sapraŭdnym elektronnym adrasam.

U Dziarždepartamiencie zajavili, što «praviaduć detalovaje rasśledavańnie i praciahnuć ukaranieńnie mier biaśpieki, kab praduchilić padobnyja vypadki ŭ budučyni». Pradstaŭniki viedamstva admovilisia raskryvać źmiest paviedamleńniaŭ albo imiony čynoŭnikaŭ, jakija stali abjektami ataki.

Incydent z Rubia adbyŭsia na fonie inšych niadaŭnich sprob machlarstva, nakiravanych na vysokapastaŭlenych asob u ZŠA. U mai, pa infarmacyi Wall Street Journal, chtości atrymaŭ dostup da telefona kiraŭnicy administracyi Biełaha doma Siuzi Uajłs i pačaŭ telefanavać sienataram, hubiernataram i biznesmienam ad jaje imia.

Hetaja situacyja vyklikała rasśledavańnie z boku Biełaha doma i FBR, adnak Donald Tramp nie nadaŭ vypadku surjoznaha značeńnia, zajaviŭšy, što Uajłs — «dzivosnaja žančyna», jakaja «sama spravicca».

FBR admoviłasia kamientavać situacyju z padrobnym Rubia. Padrobka asoby fiederalnaha čynoŭnika z metaj machlarstva abo atrymańnia vyhady źjaŭlajecca kryminalnym złačynstvam.

Kamientary da artykuła