Byłomu namieśniku načalnika rasijskaha Hienštaba dali 17 hadoŭ źniavoleńnia

U Rasii byłoha namieśnika načalnika Hienštaba Uzbrojenych sił hienierał-pałkoŭnika Chaliła Arsłanava asudzili na 17 hadoŭ pazbaŭleńnia voli za chabarnictva i bujnoje machlarstva. Jaho pakarali kałonijaj strohaha režymu, aštrafavali na 24 miljony rasijskich rubloŭ (kala 305 tysiač dalaraŭ. u dva razy bolš, čym suma chabaru), a taksama pazbavili zvańnia, ordenaŭ Žukava i «Za zasłuhi pierad Ajčynaj», paviedamlaje «Kommiersant'».

Chalił Arsłanaŭ. Fota: Kommiersant'

Sud pryznaŭ Arsłanava vinavatym u machlarstvie i atrymańni chabaraŭ u asabliva bujnym pamiery. U tym ža kryminalnym rasśledavańni fihuravali jašče dva čałavieki — pałkoŭnik Pavieł Kutachaŭ i vajskovy piensijanier Ihar Jakaŭleŭ, jakija atrymali adpaviedna 7 i 6 hadoŭ źniavoleńnia.

Arsłanava abvinavacili jašče ŭ 2019 hodzie. Pavodle śledstva, jon z saŭdzielnikami praz kampaniju «Vajentelekam» z 2013 hoda prysvojvaŭ dziaržaŭnyja hrošy, zavyšajučy ceny na kantrakty dla Minabarony. Suma naniesienaj škody skłała kala 1,6 miljarda rubloŭ (kala 20,3 miljona dalaraŭ). Taksama jaho abvinavačvajuć u vymahańni 12 miljonaŭ rubloŭ (kala 150 tysiač dalaraŭ) u byłoha kiraŭnika Jarasłaŭskaha radyjozavoda.

Sam Arsłanaŭ svajoj viny nie pryznaŭ. Niekatoryja inšyja fihuranty spravy, u tym liku jaho padnačaleny hienierał-major Alaksandr Ahłoblin, pajšli na supracoŭnictva sa śledstvam i dali pakazańni suprać jaho.

U dačynieńni da Chaliła Arsłanava praciahvajuć rasśledavać jašče adnu spravu, źviazanuju z zakupkaj vajskovych radyjostancyj. Niekatoryja kamientatary adznačyli, što prysud moh by być i bolš žorstkim, zvažajučy na maštab machinacyj.

Kamientary da artykuła