Niderłandy adpraviać svaje źniščalniki, kab achoŭvać šlachi vajskovaj dapamohi Ukrainie
Ź vieraśnia Niderłandy nakirujuć svaje źniščalniki F-35 u Polšču dla achovy pavietranaj prastory NATA sumiesna z Narviehijaj. Pavodle słoŭ ministra abarony Niderłandaŭ Rubiena Brekiełmansa, heta nieabchodna dla biaśpieki krainy i dla taho, kab strymlivać Rasiju i abaraniać šlachi pastavak dapamohi va Ukrainu.
Zdymak ilustracyjny. Fota: Ministerstva abarony Niderłandaŭ
Narviehija taksama paviedamiła, što jaje samaloty buduć achoŭvać aeraport u Žešavie, praź jaki prachodzić asnoŭnaja vajskovaja i humanitarnaja dapamoha dla Ukrainy. Ministr abarony Narviehii Tory Sandvik padkreśliŭ, što heta robicca dla padtrymki Ukrainy i demanstracyi viernaści sajuźnickim abaviazkam u NATA. Jon adznačyŭ, što rasijskaja ahresija pakazała, nakolki važnaja supraćpavietranaja abarona.
Sa śniežnia 2024 hoda achovu aeraporta ŭ Žešavie zabiaśpiečvajuć narviežskija zienitna-rakietnyja kompleksy NASAMS. Pobač znachodzicca baza Jasionka, praź jakuju zachodnija krainy pieradajuć Ukrainie zbroju i techniku. Raniej tam słužyli amierykanskija vajskoŭcy, ale z krasavika ich pačali źmianiać vajskoŭcy z Narviehii, Hiermanii, Vialikabrytanii i Polščy.
U studzieni Hiermanija raźmiaściła kala Žešava dźvie batarei sistemy Patriot, jakija zamianili amierykanskija. Choć ZŠA vyrašyli vyvieści svaich vajskoŭcaŭ, pradstaŭniki Pientahona i polskija ŭłady zapeŭnili, što baza praciahnie bieśpierabojnuju pracu pa padtrymcy Ukrainy.
Čytajcie taksama:
Bild publikuje «sakretny śpis» zbroi, jakuju Ukraina prosić u Hiermanii
ZŠA nie spyniajuć dapamohu Ukrainie
Ukrainski piłot raźbiŭsia na F-16 padčas načnoj ataki
Jeŭropa zmahła zachavać adzinstva z Trampam na vypadak napadu Rasii