Karpaŭ Cichanoŭskamu: Davajcie dla pačatku paznajomimsia, a paśla ŭžo pasvarymsia
Nie ŭpeŭnieny ŭ svaim pravie davać vam parady, ale mahčyma vam varta spačatku razabracca ŭ tym, jak vyhladaje śviet, u jakim vy apynulisia, źviarnuŭsia da Siarhieja Cichanoŭskaha ŭ svaim fejsbuku Staś Karpaŭ.
Siarhiej Cichanoŭski na mitynhu ŭ Vilni, 28 červienia 2025. Fota: Naša Niva
Pavažany spadaru Cichanoŭski! Moj list u butelcy budzie dosyć karotkim i, spadziajusia, strymanym. Bo raptam butelka dapłyvie.
Paru dzion tamu vy źbirali 200 tysiač jeŭra na «mocny ŭdar pa režymie». Siońnia vy padličyli, što nie sabrali i tamu vyrašyli, što biełarusy zasłuhoŭvajuć pahardy, uščuvańnia i paprokaŭ.
Mahčyma, vam było b varta spačatku razabracca ŭ tym, jak vyhladaje śviet, u jakim vy apynulisia. Pierš čym nanosić mahutnyja ŭdary.
Nie ŭpeŭnieny ŭ svaim pravie davać vam parady, ale mahčyma. Mahčyma było b varta razabracca.
Niekatoryja epizody ja mahu nahadać.
Sotni tysiač biełarusaŭ niekalki hadoŭ tamu sprabavali dziejničać samastojna.
I z rašučaściu, i z upartaściu, i z samaaddanaściu ŭ ich usio było cudoŭna. I z danatami, darečy, taksama.
Ale čas išoŭ. Ludzi žyli. Jak mahli.
Za 5 hadoŭ tysiačy ludziej prajšli praz katavańni, praz zvalnieńni i praz pasadki. Ludzi pamirali, ludzi vyjazdžali.
Represii ŭ Biełarusi, vajna va Ŭkrainie. Biaskoncy strach i biezdapamožnaść.
Usio heta nie robić ludziej bolš kansalidavanymi. Heta robić ludziej bolš zakłapočanymi vyžyvańniem.
Heta nie biełaruskaja rysa niaŭdziačnaj pastvy. Heta tak isnuje naš vid. Taki ŭ jaho fienatyp.
Nie ŭpeŭnieny, što biełarusam zaraz patrebny čałaviek, jaki učora paprosić u ich 200 tysiač baksaŭ chier viedaje na što, a zaŭtra abvinavacić ich u tym, što jany — plaŭki na asfalcie. Adzin čuvak, jakoha viečna nie zadavalniaje narodziec, u nas užo jość.
Pry ŭsioj pavazie da vašaj bijahrafii, biełarusy vam ničoha nie pavinny. I ŭ 20-m ryzykavali ŭsie. Kamuści pašancavała bolej, kamuści nie pašancavała zusim. Niekatorym kudy mieniej za vas.
Mahčyma, kali vy chočacie być lidaram, vam varta pavieści siabie jak lidar. To-bok, palubić hetych ludziej. Zrazumieć hetych ludziej. I dla pačatku navučycca pavažać hetych ludziej nie jak karmavuju bazu, a jak tych, chto raździalaje z vami los hetaj krainy, jakaja ŭsio jašče dla niekatorych strana dla žiźni, ale ni dla koha kraina dla žyćcia.
Karaciej. Heta novy śviet. Heta novy sumny śviet, u jakim vy nie viedajecie biełarusaŭ, a jany nie viedajuć vas.
Davajcie dla pačatku paznajomimsia, a paśla ŭžo pasvarymsia.