U Azierbajdžanie vyrašyli zakryvać ruskamoŭnyja škoły

Na fonie abvastreńnia adnosin z Rasijaj u Azierbajdžanie paviedamili pra paetapnaje zakryćcio ruskamoŭnych škoł ź pierachodam na navučańnie na azierbajdžanskaj movie. U krainie bolš za 300 škoł, dzie vučać na ruskaj movie.

Fota: mtk.edu.az

Azierbajdžan na fonie abvastreńnia adnosin z Rasijaj pryniaŭ rašeńnie pačać zakryćcio ruskamoŭnych škoł u krainie, paviedamiŭ partał Oxu.az. 

Partał sa spasyłkaj na baćkoŭ piša, što ŭ školnyja hrupy ŭ WhatsApp pastupili adpaviednyja paviedamleńni, zakryvać ich buduć paetapna.

«U bližejšyja try hady ruskamoŭnyja škoły pierachodziać na vykładańnie na azierbajdžanskaj movie, buduć arhanizavany kursy pierapadrychtoŭki dla nastaŭnikaŭ», — paviedamlaje Oxu.az.

Vydańnie Mektebgushesi adznačaje, što ŭ Azierbajdžanie pracujuć 340 ruskamoŭnych škoł, u 16 ź ich navučańnie viadziecca tolki na ruskaj movie, u astatnich — na dźviuch movach. Bolšaść škoł znachodzicca ŭ Baku.

Mižnarodny skandał pamiž Rasijaj i Azierbajdžanam uźnik paśla taho, jak 27 červienia ŭ Jekaciarynburhu byli zatrymanyja pradstaŭniki azierbajdžanskaj dyjaspary pa spravach pra zabojstvy i zamachi na zabojstva ŭ 2001, 2010 i 2011 hadach. Niekatoryja krynicy pisali pra zatrymańnie 50 čałaviek.

Dva padazravanyja padčas śledčych mierapryjemstvaŭ pamierli.

Rasijski Śledčy kamitet zajaviŭ, što adzin ź ich pamior ad serca, a pryčyna śmierci druhoha «ŭstanaŭlivajucca».

Azierbajdžanskaja bok paśla sudmiedekśpiertyzy zajaviŭ, što pryčynami śmierci stali šmatlikija traŭmy na ich ciełach, tam zaviali kryminalnuju spravu pa artykułach za naŭmysnaje zabojstva, katavańni i pieravyšeńnie słužbovych paŭnamoctvaŭ.

Baku pačaŭ sa svajho boku dziejańni suprać rasijan. U pryvatnaści, siłaviki praviali rejd u redakcyi Sputnik Azerbaijan. Byli aryštavany vykanaŭčy dyrektar Ihar Kartavych i šef-redaktar Jaŭhien Biełavusaŭ nibyta za niezakonnaje pradprymalnictva, lehalizacyju złačynnych dachodaŭ. 

Akramia taho, 1 lipienia ŭłady krainy abviaścili pra zatrymańnie jašče niekalkich hrup rasijan, jakich abvinavacili ŭ tranzicie narkotykaŭ ź Irana i kibierzłačynstvach. Pakazanyja zatrymanyja byli mocna źbityja.

U Rasii taksama praciahvajucca zatrymańni azierbajdžancaŭ. 

Kamientary da artykuła