Na drafcie NCHŁ pieršym ź biełarusaŭ vybrali 17-hadovaha bramnika sa spartyŭnaj dynastyi

Na drafcie NCHŁ, jaki zaraz prachodzić u Łos-Andželesie, pieršym ź biełarusaŭ staŭ nie čakany favaryt — napadajučy minskaha «Dynama» Jahor Borykaŭ, a 17-hadovy bramnik Arsień Radźkoŭ, jaki vystupaje za «Ciumienski lehijon» u Maładziožnaj chakiejnaj lizie.

Arsień Radźkoŭ

Kłub NCHŁ «Manreal» vybraŭ Arsienia ŭ trecim raŭndzie pad ahulnym 82-m numaram.

Arsień — syn kaliści viadomaha biełaruskaha futbalista, a ciapier treniera Arcioma Radźkova, jaki ŭznačalvaje kiprski kłub «Arys» ź Limasoła.

U papiarednim siezonie biełarus adyhraŭ 19 matčaŭ u Maładziožnaj chakiejnaj lizie za «Ciumienski lehijon», u siarednim adbivajučy 92% kidkoŭ. Taksama ŭ aktyvie Arsienia niekalki hulniaŭ za junackuju zbornuju Biełarusi. Nastupny siezon Radźkoŭ praviadzie ŭ amierykanskaj lizie NCAA ŭ składzie kamandy ŭniviersiteta Masačusietsa.

Arsień Radźkoŭ staŭ čaćviortym biełaruskim hałkipieram u historyi, jakoha zadraftavaŭ kłub NCHŁ.

Što tyčycca 19-hadovaha forvarda minskaha «Dynama» Jahora Borykava, to jaho vybraŭ u 4-m raŭndzie kłub «Juta Mamant». Jahony ahulny draftavy numar — 110-y.

Kamientary da artykuła