MZS Polščy: «Pamahatary» ŭ rehistracyi na padaču na vizy pierastali być efiektyŭnymi

Polski MZS miarkuje, što ŭviedzienaja letaś videavieryfikacyja padčas rehistracyi na padaču dakumientaŭ na vizy palepšyła hety praces, a pasłuhi niezakonnych pasiarednikaŭ pierastali być efiektyŭnymi. Heta vynikaje z adkazu departamienta infarmacyi MZS Polščy sa spasyłkaj na Konsulski departamient na pytańni telekanała «Biełsat» adnosna ciažkaściaŭ, ź jakimi sutykajucca biełarusy, sprabujučy atrymać polskija vizy. Asobna viedamstva raskazała pra situacyju z humanitarnymi vizami. 

Budynak Ministerstva zamiežnych spraŭ Polščy. Varšava, 26 krasavika 2024 hoda. Zdymak ilustracyjny. Fota: Biełsat

Polskija konsuły ŭvieś čas sočać za situacyjaj ź vizami

Niadaŭna raskazvałasia, praz što prachodziać biełarusy, jakija chočuć atrymać polskuju vizu, naprykład, pracoŭnuju. Zapisu na padaču dakumientaŭ u Miensku ciapier davodzicca čakać čatyry miesiacy i daŭžej. I heta navat praz «pamahataraŭ» i za niemałyja hrošy. Polšča abiacała zmahacca z pasiarednikami i botami, jakija reziervujuć miescy na sajcie vizavaha centru, uvodziła dadatkovyja patrabavańni, naprykład, videavieryfikacyju, adnak vidać, što robicca tolki horš.

Historyj biełarusaŭ, jakija źviarnulisia da «pamahataraŭ» i ŭžo niekalki miesiacaŭ čakajuć, pakul ich zapišuć na padaču dakumientaŭ dla vizy — proćma, u čym možna pierakanacca, zazirnuŭšy ŭ admysłovyja čaty, pryśviečanyja zapisu na vizy ci łoŭli dataŭ na padaču dakumientaŭ.

«Biełsat» napisaŭ zapyt u MZS Polščy. U im jon spytaŭsia, čamu biełarusam usio składaniej zapisacca dy atrymać polskija vizy roznych typaŭ i ci viadziecca niejkaja baraćba z «pamahatarami», jakija zusim nie źnikajuć, a naadvarot, pracujuć dy padymajuć ceny. A taksama — što rabić biełarusam, kab prabicca praz usie biurakratyčnyja pieraškody i ŭsio ž atrymać vizu.

Departamient infarmacyi MZS u svaim adkazie havoryć, što polskija konsuły ŭvieś čas sočać za situacyjaj ź vizami i prykładajuć namahańni dla palapšeńnia sistemy pryjomu zajavak vonkavym pastaŭcam pasłuh (vizavy centr VFS Global — aficyjny partnior polskaj ambasady ŭ Biełarusi).

«Tamu była ŭviedzienaja dadatkovaja pracedura praviarańnia asoby, kab paźbiehčy ŭdziełu miascovych pasiarednikaŭ u pracesie padačy zajavak na vizu. Pavodle nazirańniaŭ, paśla ŭviadzieńnia pasłuhi vynikaje, što niezakonnyja pasiaredniki pierastali być efiektyŭnymi», — havorycca ŭ atrymanym «Biełsatam» liście z MZS.

MZS papiaredžvaje pra niedapuščalnaść karystańnia pasłuhami pasiarednikaŭ

Infarmacyja pra daty vyzvaleńnia nastupnych miescaŭ na padaču dakumientaŭ dla vizaŭ publikujecca na sajtach VFS Global. Praź vialikuju zacikaŭlenaść vizami vakantnyja miescy zajmajucca ciaham dvuch-troch hadzin paśla ich zapusku, tamu ludzi, jakija nie paśpiavajuć zarehistravacca, atrymlivajuć paviedamleńnie ad sistemy pra niemahčymaść rehistracyi. Takaja situacyja źviazanaja nie ź sistemaj, a z abmiežavanaj kolkaściu miescaŭ, śćviardžaje dypłamatyčnaje viedamstva.

Pry hetym padkreślivajecca, što i polskija konsuły, i Ministerstva zamiežnych spraŭ papiaredžvajuć pra niedapuščalnaść karystańnia pasłuhami niezakonnych pasiarednikaŭ.

«Pasiaredniki nijak nie supracoŭničajuć z polskimi konsułami. I ich pasłuhi, choć i vysokaapłatnyja, nie ŭpłyvajuć na vydaču vizy. Varta adznačyć, što z rostam popytu na vizy hety vid dziejnaści raźličany vyklučna na vymahańnie srodkaŭ u patencyjnych zajaŭnikaŭ na vizu bieź jakich-niebudź harantyj jaje vydačy. My padkreślivajem, što konsuły ŭvieś čas kantralujuć vizavuju sistemu i nie spyniajuć svaich namahańniaŭ dziela ŭdaskanaleńnia sistemy pryjomu zajavak ad vonkavych pastaŭščykoŭ pasłuh», — kaža MZS.

Humanitarnuju vizu daduć, kali jość pahroza žyćciu ci zdaroŭju

Asobna «Biełsat» zapytaŭsia pra situacyju z humanitarnymi vizami, bo jość śviedčańni, što zdarajucca situacyi, kali konsulstva ŭ Minsku admaŭlała ŭ hetym typie vizy biełarusam navat z dokazami represij.

Zajaŭki na humanitarnyja vizy razhladajucca i vizy vydajucca, zajaŭlaje MZS Polščy. Na siońniašni dzień kožnaja zajaŭka razhladajecca indyvidualna, kab vyznačyć, ci isnuje realnaja pahroza z boku ŭładaŭ Biełarusi dla kankretnaj asoby.

«Varta padkreślić, što vydača humanitarnaj vizy musić być źviazanaja z realnymi situacyjami, niepasredna źviazanymi z pahrozaj žyćciu abo zdaroŭju zajaŭnika i jahonych blizkich svajakoŭ abo kryminalnaj adkaznaściu za dziejańni, niazručnyja dla ŭładaŭ Biełarusi (u tym liku za ŭdzieł u akcyjach pratestu, apazicyjnuju dziejnaść). Pytańni mižnarodnaj abarony musiać vyśviatlacca niepasredna z kiraŭnikom Upraŭleńnia pa spravach zamiežnikaŭ, jakaja jość orhanam, kampietentnym u nadańni mižnarodnaj abarony», — zaznačajecca ŭ adkazie z MZS.

Kamientary da artykuła