Płastyčnamu chirurhu ź Biełarusi vynieśli ŭ Maskvie abvinavaŭčy prysud i adpraŭlajuć u kałoniju
Płastyčnaha chirurha Kaciarynu Łanskuju, jakaja rodam ź Minska, ale ciapier žyvie i pracuje ŭ Maskvie, rasijski sud pryhavaryŭ da 11 miesiacaŭ kałonii-pasialeńnia. Akramia taho, joj zabaranili zajmacca prafiesijnaj dziejnaściu na 2,5 hoda, paviedamlaje ŭ svaim telehram-kanale Ksienija Sabčak.
Kaciaryna Łanskaja. Skryn videa: sobchak / YouTube
Łanskaja pryznanaja vinavataj u naniasieńni ciažkaj škody zdaroŭju pa nieaściarožnaści ŭ spravie Iny Barady — žonki prezidenta Fiederacyi jaŭrejskich abščyn Rasii.
Pavodle abvinavačvańnia, paśla blefarapłastyki ŭ maskoŭskaj klinicy «Kłazko» paciarpiełaja nibyta aślepła. Adnak abarona śćviardžała, što zrok u jaje adnaviŭsia paśla reabilitacyi, a maralnaja škoda była kampiensavanaja.
Advakat Łanskoj Kryścina Vysockaja zajaviła, što rašeńnie suda budzie abskardžana. Jana nazvała prysud parušeńniem zakona i prykładam taho, što «pravasudździe pieratvaryłasia ŭ pusty huk».
Pavodle jaje słoŭ, u spravie ŭsio było zrazumieła z samaha pieršaha pasiadžeńnia: śviedki kazali, što pacyjentka była zadavolenaja vynikam apieracyi, a ekśpierty śćviardžali, što pry sudova-miedycynskaj ekśpiertyzie byli dapuščanyja pamyłki ŭ acency ciažkaści škody zdaroŭju. Kala dziesiaci daktaroŭ roznych śpiecyjalnaściaŭ paćvierdzili, što Łanskaja nie zrabiła prafiesijnych pamyłak.
Vysockaja aburałasia tym, što sud nie chacieŭ słuchać prafiesijanałaŭ i ihnaravaŭ dakumienty. Jana śćviardžaje, što paciarpiełaja nikoli nie hublała zrok, sama prysutničała na sudzie i hladzieła na sudździu, kali davała pakazańni. Ale kali jaje spytali, jaki ŭ jaje ciapier zrok, jana adkazała: «Heta nie maje značeńnia». I heta, pavodle advakatki, zadavoliła i sud, i prakurora.