Praź Biełaruś na rasijski zavod pastaŭlalisia impartnyja stanki dla vyrabu rakiet

Pavodle rasśledavańnia ŭkrainskaha vydańnia The Kyiv Independent, biełaruskija pradpryjemstvy ŭdzielničali ŭ pastaŭkach impartnaha abstalavańnia dla rasijskaha zavoda, dzie vyrablajucca rakiety.

Votkinski zavod. Fota: udmrspp.ru

Žurnalisty vyśvietlili, što try biełaruskija kampanii — Homielski zavod stankoŭ i vuzłoŭ, «Biełaruskija stanki» i «Hiefiest» — pierapravili ŭ Rasiju zamiežnyja stanki, kab dapamahčy pavialičyć vypusk rakiet «Iskander» i inšych typaŭ balistyčnaj zbroi.

Abstalavańnie pastupiła praz pryvatnych rasijskich pasiarednikaŭ, a sami stanki byli vyrablenyja ŭ Kitai, Tajvani i Biełarusi — krainach, jakija nie padtrymali sankcyi suprać Rasii. Usiaho, pavodle danych žurnalistaŭ, było ŭvieziena stankoŭ na 11 miljonaŭ dalaraŭ.

Havorka idzie pra važnaje abstalavańnie — freziernyja, takarnyja i šlifavalnyja stanki, što vykarystoŭvajucca dla dakładnaj apracoŭki mietału — klučavoha materyjału dla vytvorčaści rakiet. Heta dało mahčymaść Votkinskamu zavodu, jaki mieścicca ŭ rasijskaj Udmurcii, madernizavać vytvorčaść, nabrać novych supracoŭnikaŭ (kala 2 500 čałaviek) i pabudavać dva dadatkovyja cechi.

Votkinski zavod vyrablaje nie tolki «Iskandery», jakimi Rasija abstrelvaje Ukrainu, ale i mižkantynientalnyja rakiety «Jars» i «Bułava», zdolnyja nieści jadziernyja bojehałoŭki i dasiahać ZŠA. Pavodle infarmacyi, zavod taksama pracuje nad rakietaj «Arešnik», jakaja moža pahražać usioj terytoryi Jeŭropy.

Kamientary da artykuła