U minskim ofisie «Śvietu tankaŭ» masava patrucilisia supracoŭniki
U minskim ofisie kampanii «Hiejm Strym», jakaja zajmajecca raspracoŭkaj hulni «Śviet tankaŭ», naprykancy minułaha tydnia adbyłosia masavaje atručvańnie supracoŭnikaŭ, daviedałasia «Lusterka».
Fota ilustracyjnaje
Pavodle roznych krynic, paśla abiedaŭ, jakija padavali 19 i 20 červienia, prykładna 150 čałaviek adčuli siabie drenna, niekatoryja trapili ŭ balnicu. Mnohija dahetul znachodziacca na balničnym.
Alaksiej, adzin z supracoŭnikaŭ, raskazaŭ, što ŭ tyja dni ŭ ofisie nie byŭ, ale pra zdareńnie daviedaŭsia ad kaleh. Jon adznačyŭ, što abiedy pastaŭlaje asobny padradčyk i, imavierna, prablema była ź jaho boku.
Pavodle papiarednich źviestak, pryčynaj atručvańnia mahła stać salmanieła — niebiaśpiečnaja bakteryja, jakaja vyklikaje vostraje zaražeńnie z vysokaj tempieraturaj, bolem u žyvacie i inšymi simptomami.
Aficyjnych kamientaroŭ ad kampanii pakul niama, ale ŭ pryjomnaj «Hiejm Stryma» paćvierdzili, što incydent sapraŭdy mieŭ miesca, i ciapier situacyju rasśleduje Minski centr hihijeny i epidemijałohii. Vynikaŭ pravierki jašče nie ahučyli.
«Hiejm Strym» — filijał rasijskaj kampanii «Lesta Hulni», jakaja paśla 2022 hoda vykupiła biźnies Wargaming u Rasii i Biełarusi i pierajšła pad dziaržaŭny kantrol u červieni 2025 hoda.
Čytajcie taksama:
Raspracoŭščyk hulni «Śviet tankaŭ» aficyjna pierajšoŭ va ŭłasnaść rasijskaj dziaržavy