Rubia pra sankcyi suprać Rasii: Tramp viedaje pravilny čas i miesca dla ich uviadzieńnia
Dziaržsakratar ZŠA Marka Rubia zajaviŭ u intervju Politico, što novyja sankcyi suprać Rasii mohuć naškodzić patencyjnym pieramovam.
Fota: Alex Brandon / AP
Uładzimir Zialenski i inšyja jeŭrapiejskija lidary spadziajucca pierakanać Trampa ŭ sieradu, padčas samitu NATA ŭ Haazie, uvieści novyja sankcyi suprać Rasii, bo Uładzimir Pucin nieadnarazova adchilaŭ amierykanskija prapanovy ab spynieńni ahniu.
«Kali my zrobim toje, čaho ŭsie tut ad nas chočuć, a mienavita kab ŭmiašalisia i razhramili ich novymi sankcyjami, my, vierahodna, stracim mahčymaść vieści ź imi pieramovy ab spynieńni ahniu, i chto tady budzie ź imi razmaŭlać?» — skazaŭ Rubia.
Jon dadaŭ, što Tramp «viedaje pravilny čas i miesca» dla novych ekanamičnych mieraŭ. Pavodle słoŭ Rubia, prezidenckaja administracyja pracuje z Kanhresam, kab zabiaśpiečyć Trampu adpaviednuju hnutkaść.
Ale kali ZŠA vyrašać uvieści sankcyi, dadaŭ jon, heta značyć, što akno dla pieramovaŭ z Rasijaj, vierahodna, zakryjecca.
«Kali jon heta zrobić, heta budzie amal pryznańniem taho, što bližejšym časam pieramovy nie adbuducca», — skazaŭ Rubia.
«My budziem praciahvać uzajemadziejańnie. U tym sensie, što kali ŭ nas źjavicca mahčymaść štości źmianić i prymusić ich sieści za stoł pieramovaŭ, my joju skarystajemsia», — dadaŭ dziaržsakratar ZŠA.
Pakolki pieramovy z Rasijaj zajšli ŭ tupik, Rubia zajaviŭ, što Maskva ličyć, što moža dasiahnuć svaich terytaryjalnych metaŭ na poli boju — z čym Vašynhton nie zhodny.
«Naša adčuvańnie takoje, što rasijanie buduć sprabavać dasiahnuć na poli boju taho, čaho jany patrabavali za stałom pieramovaŭ, a mienavita zachavańnia administracyjnych miežaŭ peŭnych terytoryj i h.d. My ličym, što im budzie značna ciažej dasiahnuć hetaha, čym jany dumajuć», — dadaŭ Rubia.
Čytajcie taksama:
Tramp pierad samitam NATA: Zialenski — dobry chłopiec
Zialenski ŭpieršyniu źjaviŭsia na samicie NATO ŭ kaściumie — ale nie ŭ kłasičnym