U Mahilovie paśla prapahandysckaj kampanii za budaŭnictva carkvy ŭ achoŭnaj zonie lesaparku vyjaviłasia, što budavać jaje nielha

Mahiloŭcaŭ pierakonvali va ŭsieahulnaj padtrymcy budaŭnictva pravasłaŭnaha chrama mienavita ŭ hetym miescy i marnych aściarohach za lubimy haradžanami lesapark. Ciapier čynoŭniki vymušany byli pryznać, što budaŭnictva ŭ hetym miescy parušaje zakon. 

Carkva Dabravieščańnia Najśviaciejšaj Baharodzicy i dom kliru, jakija płanujuć pabudavać na častcy achoŭnaj zony Piačerskaha lesaparku. Rendar z materyjałaŭ hramadskaha abmierkavańnia

U kancy krasavika — pačatku maja 2025 hoda ŭ Mahilovie prachodziła hramadskaje abmierkavańnie budaŭnictva cełaha kompleksu pravasłaŭnaha chrama Dabravieščańnia Najśviaciejšaj Baharodzicy pa vulicy Jakuboŭskaha, jaki vyrašyli raźmiaścić naŭprost na terytoryi Piačerskaha lesaparku, adnaho ź niešmatlikich miescaŭ adpačynku ŭ horadzie. 

U kancepcyi, vyniesienaj na abmierkavańnie, byŭ praihnaravany toj fakt, što hetaja terytoryja husta zasadžanaja drevami i ŭvachodzić u achoŭnuju zonu bataničnaha zakaźnika.

U hetym miescy z 2021 hoda zabaroniena vysiečka drevaŭ — duba čareščataha, buka, klona vastralistaha, viaza (ilma, bierasta), jasienia zvyčajnaha, lipy, duhłasii (psieŭdatsuhi).

Miascovyja žychary sprabavali źbirać podpisy suprać, ale čynoŭniki ich ihnaravali, a zborščykaŭ vyklikali na razmovy ŭ milicyju. Paralelna ŭ dziaržaŭnych miedyja raźviarnułasia kampanija za budaŭnictva carkvy ŭ hetym miescy.

Chramavy kompleks na rahu vulicy Jakuboŭskaha i biezymiennaha prajezda. Rendar z materyjałaŭ hramadskaha abmierkavańnia

Miesca, dzie płanujuć pabudavać chram, ščylna zasadžana drevami, choć u dziaržaŭnaj presie jaho čamuści nazyvajuć «pustkaj». Fota: Jandeks Karty

Z ekranaŭ televizaraŭ mahiloŭcam dakazvali, što budaŭnictva inicyjavana imi samimi, što chram pabudujuć na «pustcy», a pradstaŭnik «Mahiloŭzielanbuda» pierakonvaŭ, što hetaja placoŭka «nijakaha dačynieńnia da terytoryi Piačerskaha lesaparku nie maje».

Usio heta nie adpaviadała rečaisnaści. Niahledziačy na heta 19 maja 2025 hoda architekturna-horadabudaŭničaja rada ź nievialikaj bolšaściu hałasoŭ, dalokaj ad adnadušša, jakoje tranślavała dziaržaŭnaja presa, dazvoliła budaŭnictva chrama ŭ hetym miescy.

Ciapier, praź miesiac paśla hetaha rašeńnia, sami čynoŭniki paćvierdzili, što budavać u hetym miescy nielha.

Adkaz čynoŭnikaŭ pra niemahčymaść budaŭnictva chrama ŭ hetym miescy. Fota: Mohilev Live

Paśla zvarotu aktyvistaŭ pradstaŭniki Mahiloŭskaha abłasnoha kamiteta pryrodnych resursaŭ i achovy navakolnaha asiarodździa i Mahiloŭskaj haradskoj rajonnaj inśpiekcyi abśledavali 17 červienia terytoryju, dzie płanujuć pabudavać carkvu. 

Čynoŭniki vyjavili, što tam sapraŭdy rastuć drevy takich parod, jak dub čareščaty, klon vastralisty, jasień zvyčajny i lipa — vydaleńnie jakich zabaroniena ŭ miežach achoŭnaj zony zakaźnika miascovaha značeńnia «Piačerski».

Paśla hetaha abłasny kamitet źviarnuŭsia da Mahiloŭskaha abłvykankama i Mahiloŭskaha harvykankama, kab tyja padšukali dla budaŭnictva carkvy inšaje miesca.

Heta zusim nie aznačaje, što carkva ŭ lesaparku nie źjavicca. Vierahodna, ułady mohuć pajści na źmianieńnie miežaŭ achoŭnaj zony — padobnaje ŭžo rabili, kab pabudavać novy korpus abłasnoj balnicy.

Kamientary da artykuła