Kulturny mieniedžar ź Viciebska Uładzimir Bułaŭski vyjechaŭ ź Biełarusi, adbyŭšy dva hady ŭ kałonii
Adzin z hałoŭnych ruchavikoŭ kultury Viciebska Uładzimir Bułaŭski byŭ siarod pieršych, kaho asudzili pa novym artykule 342-2 KK («nieadnarazovaje parušeńnie paradku arhanizacyi abo praviadzieńnia masavych mierapryjemstvaŭ») — za niekalki palityčnych administratyvak zapar. Jaho pakarali 2 hadami pazbaŭleńnia voli, jakija jon adbyvaŭ u babrujskaj kałonii №2.
Ciapier Uładzimir lehalizujecca ŭ Polščy. Jon źbirajecca vučycca pa śpiecyjalnaści «Historyja i kulturnaja spadčyna», praciahvajučy svoj viciebski prafiesijny kirunak.
Uładzimir Bułaŭski. Fota: fejsbuk.
U 2022 hodzie Uładzimira niekalki razoŭ sudzili pa administracyjnych artykułach: u lutym, u lipieni i ŭ śniežni. Apošnim jaho «pikietam» paličyli fota ŭ sacyjalnych sietkach.
U sumie ž siłaviki zatrymlivali Bułaŭskaha z 2020 hoda jak minimum piać razoŭ.
Na sudzie Uładzimir nie pryznaŭ viny i davaŭ pakazańni na biełaruskaj movie. Pakul jon znachodziŭsia ŭ SIZA, u jaho pamior tata, na pachavańnie jakoha jaho nie adpuścili.
Mieniedžar ź Viciebska całkam adbyŭ pryznačanaje pakarańnie i vyjšaŭ na svabodu vosieńniu 2024-ha. Ciapier jon rašyŭsia na emihracyju.