Niečakanaja zbroja suprać raku — supraćzapalenčyja preparaty

Chraničnaje zapaleńnie stanovicca klučavym faktaram raźvićcia raku ŭ ludziej paśla 50 hadoŭ. Navukoŭcy razhladajuć niezvyčajnyja mietady baraćby ź im — ad antyhistaminnych i supraćartrytnych da antyvirusnych preparataŭ.

Fota: Visage / Getty Images

Niahledziačy na toje, što na rak z kožnym hodam chvareje ŭsio bolš ludziej va ŭzroście da 50 hadoŭ, pavodle daśledavańniaŭ, ryzyka zachvorvańnia na jaho značna pavialičvajecca z uzrostam. Jak piša The Wall Street Journal, u ZŠA na ludziej, jakim bolš za 50 hadoŭ, prypadaje 9 z 10 dyjahnazaŭ raku.

Chraničnaje zapaleńnie — adna z pryčyn zachvorvańnia

Pryčyna nie tolki ŭ nazapašvańni mutacyj u kletkach, ale i ŭ hłybokich źmienach pracy imunnaj sistemy. Z uzrostam jana nie prosta słabieje, jak doŭha ličyłasia, ale stanovicca hipieraktyŭnaj u škodnym sensie.

Hetaja stanoŭča-patałahičnaja aktyvacyja atrymała nazvu infłamahinh (inflammaging) — chraničnaje zapaleńnie, źviazanaje sa stareńniem.

U maładoha čałavieka imunitet raspaznaje pahrozu, naprykład virus abo traŭmu, i adkazvaje karotkaterminovym zapaleńniem, kab źniščyć patahien i vylečyć tkaninu. Ale z uzrostam bałans parušajecca. Asabliva aktyŭnymi stanoviacca mijełoidnyja kletki, pryznačanyja dla chutkaj reakcyi na infiekcyi. U pažyłym arhaniźmie jany schilnyja da hipieraktyŭnaści i pačynajuć padtrymlivać pastajannaje zapaleńnie, jakoje nie źniščaje rakavyja kletki, a stvaraje spryjalnaje asiarodździe dla ich rostu.

Ekśpierymienty na myšach

Daśledčyki ź Miedycynskaj škoły Ikana pry špitali Maŭnt-Sinaj u Ńju-Jorku pasprabavali revalucyjnuju ideju baraćby z rakam — vykarystoŭvać preparaty ad alerhii i inšyja niestandartnyja leki dla padaŭleńnia infłamahinha.

Daśledavańnie na myšach va ŭzroście 72 tydniaŭ (ekvivalent 65 hadoŭ u čałavieka) pakazała, jak stareńnie imunnaj sistemy vyklikaje patahiennaje zapaleńnie, jakoje spryjaje rostu rakavych kletak. Daśledavańnie pakazała: mijełoidnyja kletki ŭ rakavych puchlinach lohkich starych myšej vypracoŭvajuć białok IL-1, źviazany ź infłamahinham. IL-1 pryciahvaŭ jašče bolš mijełoidnych kletak, uzmacniajučy zapaleńnie i rost puchlin.

Kali myšam uviali imunnyja kletki maładych asobin, raźvićcio puchliny spyniłasia.

Taksama byŭ praviedzieny test z preparatam anakinra, jaki zvyčajna vykarystoŭvajecca dla lačeńnia reŭmatoidnaha artrytu i błakuje IL-1. Kali jaho pryznačali na rańniaj stadyi, rost puchliny zamarudžvaŭsia.

Heta padkazvaje, što supraćzapalenčaja terapija moža być najbolš efiektyŭnaj dla pažyłych ludziej z vysokaj ryzykaj raku abo na pačatkovych etapach chvaroby.

Novyja padychody da lačeńnia

Na pieršy pohlad, ideja strymlivać imunnuju sistemu supiarečyć tendencyjam sučasnaj terapii raka, dzie hałoŭnaja meta — jaje «raskrucić» na baraćbu z puchlinami. Ale, jak adznačajuć śpiecyjalisty, tut jość pamyłkovaje ŭjaŭleńnie, byccam luboje zapaleńnie — heta zaŭždy dobra. Nasamreč treba adroźnivać karysnuju imunnuju aktyŭnaść ad patałahičnaj, jakaja škodzić.

Kab praduchilić abo zapavolić rak u pažyłych ludziej, daśledčyki vypraboŭvajuć viadomyja preparaty z novaj metaj. Naprykład, inhibitary janus-kinazy (JAK-inhibitary), jakija vykarystoŭvajucca dla lačeńnia ekziemy i jazvavaha kalitu, pakazali pierśpiektyvy ŭ ekśpierymientach ź lačeńniem chvorych na rak lohkich i limfomy Chodžkina. U spałučeńni ź imunaterapijaj preparat ruksalicynib (kamiercyjnaja nazva — Džakavi) spyniaŭ prahres chvaroby ŭ amal pałovy pacyjentaŭ.

Śpiecyjalisty z Maŭnt-Sinaj taksama teścirujuć supraćvirusny preparat łamivudzin, jaki viadomy jak srodak dla lačeńnia VIČ-infiekcyj. Jon užo pakazaŭ stanoŭčyja vyniki ŭ ekśpierymientach na myšach, padaŭlajučy infłamahinh, vyklikany reaktyvacyjaj staražytnych virusaŭ, ubudavanych u hienom čałavieka. Jany taksama mohuć vyklikać chraničnaje zapaleńnie.

Adna z udzielnic ekśpierymientu — 90-hadovaja žycharka Ńju-Jorka En Marc sutyknułasia z recydyvam raku lohkich. Jana ŭžo niekalki hadoŭ prachodziła imunaterapiju. I chacia lačeńnie spyniła rost asnoŭnaj puchliny, na nadnyračniku źjaviŭsia novy ačah, jaki nie reahavaŭ na standartnuju terapiju.

Paśla šaści tydniaŭ pryjomu łamivudzinu ŭ spałučeńni ź imunaterapijaj skanavańnie pakazała, što rost puchliny spyniŭsia.

Budučynia lačeńnia raka

Novyja technałohii dazvolać dakładna vyznačać, kali treba stymulavać imunnuju sistemu, a kali — supakojvać jaje.

Navukoŭcy spadziajucca, što novyja mietady dapamohuć nie tolki lačyć rak, ale i praduchilać jaho ŭ pažyłych ludziej. Infłamahinh — heta nie prosta vynik stareńnia, a patencyjnaja mišeń baraćby z rakam.

Kamientary da artykuła