Dziciačy centr, jaki admoviŭ dziaŭčynie ŭ pracaŭładkavańni za biełaruskuju movu, ułady pravieryli i znajšli parušeńni
Raniej my pisali pra historyju dziaŭčyny, jakoj admovili ŭ pracaŭładkavańni ŭ dziciačy centr raźvićcia «Skarby nacyi» tolki tamu, što jana razmaŭlaje vyklučna pa-biełarusku. Historyja nabyła taki rozhałas, što na jaje musili adreahavać i dziaržaŭnyja orhany, pra što piša ahienctva «Minsk-naviny».
Fota: dziciačy centr raźvićcia «Kids. Sokroviŝa nacii»
U adkaz na krytyku administracyja centra «Skarby nacyi» patłumačyła, što ŭvieś adukacyjny praces u ich viadziecca na ruskaj movie, tamu supracoŭnikam nieabchodna vałodać mienavita joj. Maŭlaŭ, u centry ŭsie mietadyčnyja materyjały, hulni i asiarodździe — ruskamoŭnyja.
Adnak takaja pazicyja supiarečyć biełaruskamu zakanadaŭstvu. Pavodle Kodeksa ab adukacyi, u Biełarusi dziaržaŭnymi movami źjaŭlajucca jak ruskaja, tak i biełaruskaja. Baćki majuć prava vybirać movu navučańnia i vychavańnia svaich dziaciej, a dziaržava pavinna zabiaśpiečvać umovy dla realizacyi hetaha prava.
Namieśnica kiraŭnika administracyi Centralnaha rajona Minska Ludmiła Barysienka nahadała, što, zhodna z artykułam 14 Pracoŭnaha kodeksa, zabaraniajecca dyskryminacyja pry pryjomie na pracu pa prykmiecie movy. U vypadku, kali čałaviek adčuvaje niespraviadlivaje staŭleńnie, jon maje prava źviarnucca ŭ sud.
U svaju čarhu, u dačynieńni da centra «Skarby nacyi» praviedziena pravierka. Byli vyjaŭlenyja parušeńni zakanadaŭstva ŭ arhanizacyi adukacyjnaha pracesu i biaśpieki. Akazałasia, što ŭstanova nie ŭzhadniła svaje adukacyjnyja prahramy ŭ naležnym paradku. Likvidacyja vyjaŭlenych parušeńniaŭ ciapier kantralujecca ŭpraŭleńniem adukacyi administracyi Centralnaha rajona.
Čytajcie taksama:
Kamu ź biełaruskich dziaciej nielha vučycca za miažoj? Minadukacyi prakamientavała našumieły zakon