Padatkaviki patłumačyli, čamu chadzili pa ahienctvach nieruchomaści

Pa słovach namieśnika ministra pa padatkach i zborach Uładzimira Mukviča, dziakujučy dziejańniam siłavikoŭ, u pieršuju čarhu KDB, u Biełarusi byli vykrytyja surjoznyja i sistematyčnyja vypadki nieapłaty padatkaŭ z boku ryełtarskich kampanij. Jany, pavodle tłumačeńniaŭ čynoŭnika padčas pres-kanfierencyi, chavali dachody i padatkovuju bazu, niedapłačvajučy hrošy ŭ biudžet.

Na hety momant MNS užo pravodzić try pravierki, a šerah jašče płanujecca. Niekatoryja kampanii, jak adznačyŭ Mukvič, sami pajšli na vypraŭleńnie parušeńniaŭ, ale «znachodziacca i tyja, chto ličyć, što dziaržava nie zmoža dakazać ich vinavataść».

Namieśnik ministra taksama adznačyŭ vyjaŭlenyja parušeńni ŭ inšych śfierach:

• Taksi: kala 1800 pieravozčykaŭ trapili pad uvahu padatkavikoŭ, choć usiaho ŭ rejestry kala 5000 subjektaŭ. Pavodle acenak, suma ŭchileńnia ad padatkaŭ pieravysiła 100 miljonaŭ rubloŭ. Praviedzienyja 764 administracyjnyja pracesy, aryštavana 38 aŭtamabilaŭ, a suma ŭtojenaj vyručki skłała 2,8 miljona rubloŭ.
• Miedycynskija pasłuhi: vyjaŭlena ŭtojenaja vyručka na 10 miljonaŭ rubloŭ.
• Hulniavy biznes: z pačatku 2025 hoda vyjaŭlena bolš za 30 parušeńniaŭ, vinavatyja pryciahnuty da adkaznaści. Adna kampanija straciła licenziju za niavypłatu padatkaŭ.

Nahadajem, što jašče ŭ krasaviku 2025 hoda ŭ Biełarusi prajšli masavyja pieratrusy ŭ ahienctvach nieruchomaści: byli zatrymańni, u tym liku kiraŭnikoŭ. A 12 maja Alaksandr Łukašenka padpisaŭ novy zakon ab ryełtarskaj dziejnaści, jaki likviduje instytut ahientaŭ pa apieracyjach ź nieruchomaściu.

Kamientary da artykuła