Nazvany top-25 kampanij ź biełaruskim kapitałam na Padlaššy

Biełaruski biznes praciahvaje zamacoŭvacca ŭ Polščy. Jak situacyja vyhladaje ŭ Padlašskim vajavodstvie — druhim paśla Varšavy rehijonie pa kolkaści zarehistravanych kampanij ź biełaruskim kapitałam — raskazvaje novaje daśledavańnie.

Pieršaje miesca top-25 zaniała aŭtatranspartnaja kampanija Bilax Fota: bilaxspzoo / Faceebook

Pavodle statystyki Centralny Osrodek Informacji Gospodarczej, na pačatak 2025 hoda ŭ Padlašskim vajavodstvie było zarehistravana 842 kampanii ź biełaruskim kapitałam — heta 11,18% ad ahulnaj kolkaści takich biznesaŭ u Polščy. Heta druhi pakazčyk paśla Varšavy i prystaličnaha Mazavieckaha vajavodstva.

Adnak, jak adznačajecca ŭ novym daśledavańni Vadzima Siachoviča, hetaja dola źnižajecca. Jašče na pačatku 2023-ha Padlašša zajmała 12,85%. Pryčyna — asnoŭny patok biełaruskaha rełakavanaha biznesu skiroŭvajecca ŭ stalicu. Choć na Padlaššy za hod i źjaviłasia 202 novyja jurasaby ź biełaruskim kapitałam, inviestycyjnaja pryvabnaść rehijona źnižajecca.

Vyručka ŭpała, asabliva ŭ transparcie

Pavodle daśledavańnia, sukupnaja vyručka biełaruskich kampanij u Padlaššy za 2023 hod skłała kala 466,42 miljona dołaraŭ, što krychu bolš za 10,7% ad usioj biełaruskaj dziełavoj aktyŭnaści ŭ Polščy. Ale ŭ paraŭnańni z 2022 hodam hety pakazčyk pamienšyŭsia prykładna na 18%.

Hałoŭny ŭdar prypaŭ na transpartna-łahistyčny siektar, jaki farmiruje kala 60% usioj vyručki biełaruskich kampanij u rehijonie. Padlašša i asabliva Biełastok navat apiaredžvali Varšavu pa kolkaści zarehistravanych transpartnych kampanij, ale nie pa abjomach prodažaŭ.

Druhimi pa važnaści halinami źjaŭlajucca handal i budaŭnictva, jakija taksama adčuli nastupstvy sankcyj i ekanamičnaha spadu.

Źviartaje na siabie ŭvahu i toje, što paroh dla ŭvachodu ŭ top-25 źniziŭsia: u 2022 hodzie kampanii musili mieć vyručku ad 4,22 miljona dołaraŭ, u 2023-m — užo 4,05 miljona.

Jak adznačajuć aŭtary daśledavańnia, u paraŭnańni z 2022 hodam, top-25 źmianiŭsia amal na pałovu. Adnoj z pryčyn stała adsutnaść u adkrytym dostupie spravazdač. U vyniku z topu byli vyklučany takija bujnyja kampanii jak Beleuroglass, BIRC Transport. Adnak asnoŭnaja pryčyna — uzmacnieńnie cisku sankcyj.

Asobnaj historyjaj stała rezkaje padzieńnie handlovaj kampanii Incofer, jakaja jašče ŭ 2022 hodzie ŭvajšła nie tolki ŭ top-25 Padlašša, ale i ŭ top-100 usioj Polščy. Vyručka kampanii, ułaśnikam jakoj źjaŭlajecca biełarus i hramadzianin ZŠA Kanstancin Karpuškin, dasiahnuła 6,04 miljona dołaraŭ.

Ale ŭžo ŭ 2023 hodzie kampanija straciła amal uvieś abarot (zastałosia tolki 983 tysiačy dołaraŭ). Pryčyna — kryminalnaja sprava ŭ ZŠA suprać baćki ŭładalnika, Siarhieja Karpuškina, jaki byŭ pryznany vinavatym u niezakonnych pastaŭkach mietałapradukcyi z akupavanaj častki Ukrainy i asudžany na 21 miesiac z štrafam 4,7 miljona dołaraŭ.

Siarhiej Karpuškin naradziŭsia ŭ 1976-m u kazachstanskim Ciemirtau. Krynica: baza «Pašpart». Fon: belsteel.com

U vyniku ŭ 2023 hodzie kampanija źniziła aktyŭnaść amal u šeść razoŭ i vybyła z usich rejtynhaŭ.

Chto ŭvajšoŭ u top-5

Pieršaje miesca ŭ rejtynhu zaniała aŭtatranspartnaja kampanija Bilax — adzin z najstarejšych biełaruskich biznesaŭ u Polščy. Jana pracuje z 2005 hoda, maje centr u Biełastoku i ŭvachodzić u hrupu Belsys, źviazanuju ź Biełaruśsiu, Rasijaj, Kazachstanam i Łatvijaj. Ułaśnikami Bilax źjaŭlajucca Andrej Novikaŭ, Andrej Kunicki, Valancin Siamionaŭ i Jaŭhien Hulevič. Vyručka kampanii trochi źmienšyłasia ŭ paraŭnańni z 2022 hodam, ale zastałasia najvyšejšaj u rehijonie.

Na druhim miescy taksama aŭtatranspartnaja kampanija Azonik, zarehistravanaja ŭ 2021 hodzie. Da niadaŭniaha času jana była častkaj chołdynhu APS, jaki kantralujuć Vasil Śmiatanin i jaho partniory.

Vasil Śmiatanin. Fota: fund.mipt.ru

Treciaje miesca ŭ kampanii Komtec, jakaja zajmajecca dystrybucyjaj FMCG. Siarod jaje partnioraŭ — Coca-Cola, Pepsi, P&G, Unilever. Ułaśniki kampanii — Illa Karalevič, Alaksiej Karaban i Dźmitryj Jermałoŭski.

Na čaćviortaj pazicyi apynułasia WGT Group sp.k. (raniej viadomaja jak Gaz-Group), jakaja była lidaram u 2022 hodzie, ale jaho straciła z-za rezkaha padzieńnia vyručki. Kampanija pastaŭlaje chimičnyja i hazavyja kampanienty klijentam u Jeŭropie, Kitai, Łacinskaj Amierycy. Jaje saŭładalnik — biełarus Alaksiej Navicki.

Piataje miesca zaniała łahistyčnaja kampanija BAGAT, jakaja pracuje ŭ Biełastoku z 2010 hoda. Zasnavalniki — Jaŭhien Bochan i Jaŭhien Turaŭ, jakim naležyć i druhaja kampanija ŭ hetaj ža halinie — BGT.

Poŭny śpis top-25 možna pahladzieć pa spasyłcy.

Kamientary da artykuła