U Słavienii skrali bronzavuju statuju Miełanii Tramp
Palicyja Słavienii rasśleduje źniknieńnie bronzavaj statui pieršaj łedzi ZŠA Miełanii Tramp. Skulptura ŭ naturalnuju vieličyniu była ŭstalavanaja ŭ 2020 hodzie padčas pieršaha prezidenckaha terminu Donalda Trampa niedaloka ad horada Sieŭnica ŭ centralnaj Słavienii, dzie ŭ 1970 hodzie naradziłasia Miełanija, jakaja ŭ dziavoctvie mieła proźvišča Knaŭs, piša Euronews.
Fota: AP
Bronzavaja statuja ŭ svoj čas zamianiła draŭlanuju raboty amierykanskaha mastaka Breda Daŭni, jakaja była spalenaja nieviadomymi złamyśnikami raniej u tym ža samym hodzie.
Pres-sakratarka miascovaj palicyi Alenka Drenik Ranhus paviedamiła ŭ piatnicu, što palicyja była prainfarmavanaja pra kradziež statui 13 maja. Jana skazała, što palicyja pracuje nad pošukam vinavatych.
Bronzavaja skulptura Miełanii Tramp staić na bierazie raki Sava ŭ vioscy Rožna, niedaloka ad jaje rodnaha horada Sieŭnica. 6 listapada 2024 hoda. Fota: AP
Pavodle paviedamleńniaŭ słavienskich ŚMI, bronzavaja kopija była adpiłavanaja kala ščykałatak i źniataja z pastamientu.
Pieršaja fihura Miełanii Tramp była vyrazanaja z stvała lipy, Jana była vyjaŭlenaja ŭ bledna-błakitnaj sukiency, padobnaj na tuju, u jakoj žančyna była na inaŭhuracyi Trampa ŭ 2017 hodzie. U bronzavaj statui nie było vidavočnaha padabienstva ź pieršaj łedzi, ale pobač ź joj jość tablička, jakaja abviaščaje, što jana «pryśviečana viečnaj pamiaci pomnika Miełanii, jaki stajaŭ na hetym miescy».
Čytajcie taksama:
Bieły dom apublikavaŭ aficyjny fotazdymak pieršaj łedzi Miełanii Tramp
Kapialuš Miełanii Tramp: što chavajecca za stylnym žestam pieršaj łedzi Amieryki