Biełaruskim kańkabiežcam i fihurystam dazvolili adbiracca na Alimpijadu-2026

Mižnarodny sajuz kańkabiežcaŭ (ISU) dapuściŭ 13 biełaruskich spartsmienaŭ da ŭdziełu ŭ kvalifikacyjnych spabornictvach da Zimovych Alimpijskich hulniaŭ 2026 hoda, jakija projduć u Italii. 

Jak paviedamlajecca, heta rašeńnie było pryniata «paśla ŭvažlivaha razhladu kožnaha kankretnaha vypadku», uklučajučy vyvučeńnie publičnych zajaŭ atletaŭ ź lutaha 2022 hoda. Biełarusy buduć vystupać tolki pad niejtralnym ściaham.

U śpis dapuščanych, pavodle paviedamleńnia NAK Biełarusi, uvajšli:

Kańkabiežcy: Jahor Damaracki, Jaŭhien Bałhoŭ, Viktar Rudenka, Maryna Zujeva i Kaciaryna Hahijeva.

Šort-trek: Mikita Mihdaloŭ i Jana Dambroŭskaja.

Fihurnaje katańnie (tancy na lodzie): Viktoryja Płaskonnaja i Uładzisłaŭ Sycik.

Fihurnaje katańnie (adzinočnaje katańnie): Viktoryja Safonava, Anastasija Sidarenka, Vasil Barachoŭski i Jaŭhien Puzanaŭ.

Adbor na Alimpijadu dla kańkabiežcaŭ pavinien prajści na čatyroch etapach Kubka śvietu 2025 hoda (u listapadzie-śniežni ŭ amierykanskim Sołt-Łejk-Sici, kanadskim Kałhary, niderłandskim Chierenvienie i narviežskim Chamary).

Pradstaŭniki šort-treka zmohuć vystupić na čatyroch etapach suśvietnaha tura 2025 hoda (u kastryčniku-listapadzie ŭ kanadskim Manreali, amierykanskim Sołt-Łejk-Sici, polskim Hdańsku i niderłandskim Dordrechcie).

Fihurysty pakul dapuščanyja tolki da kvalifikacyjnaha turniru, jaki adbudziecca 17-21 vieraśnia 2025 hoda ŭ Piekinie, paviedamili ŭ Mižnarodnym sajuzie kańkabiežcaŭ.

Zimovyja Alimpijskija Hulni płanujecca pravieści z 6 pa 22 lutaha 2026 hoda ŭ italjanskich Miłanie i Karcina-d'Ampieca.

Kamientary da artykuła