U Vialikabrytanii źbirajucca zavodzić kryminałki na tych, chto załazić na pomnik Čerčylu
Brytanski ŭrad choča ŭvieści zabaronu załazić na pomnik Uinstanu Čerčylu na Parłamienckaj płoščy ŭ Łondanie. Statuju płanujuć aficyjna ŭklučyć u śpis pomnikaŭ, pryśviečanych vajskoŭcam Pieršaj i Druhoj suśvietnych vojnaŭ. Za parušeńnie novaha zakona budzie pahražać da troch miesiacaŭ turmy i štraf da 1000 funtaŭ sterlinhaŭ, piša Bi-bi-si.
Pomnik Čerčylu rehularna razmaloŭvajecca demanstrantami roznymi łozunhami. Fota: Getty Image
Choć pomnik Čerčylu pakul nie źjaŭlajecca vajennym miemaryjałam, ministr unutranych spraŭ Iviet Kupier choča źmianić heta. U śpis taksama ŭvojduć inšyja značnyja pomniki, naprykład, «Kienataf» u Uajtchole i Miemaryjał karaleŭskaj artyleryi ŭ Hajd-parku.
Hety krok źjaŭlajecca častkaj bolš šyrokaha zakonaprajekta ab palicyi i złačynnaści. Pavodle słoŭ Kupier, uklučeńnie pomnika Čerčylu ŭ śpis — heta sposab ušanavać jaho i inšyja vajennyja miemaryjały, asabliva napiaredadni Dnia Pieramohi.
Čerčyl, jak miarkujecca, sam vybraŭ miesca dla svajho pomnika jašče ŭ 1950-ch hadach. Bronzavaja čatyrochmietrovaja statuja była ŭstanoŭlenaja ŭ 1973 hodzie jahonaj udavoj Klemiancinaj pry ŭdziele karalevy Lizaviety II.
Apošnija hady statuja časta stanovicca mišeńniu pratestoŭcaŭ. U 2020 hodzie jaje razmalavali padčas akcyj Black Lives Matter i Extinction Rebellion. U 2000 hodzie jaje ablili farbaj, a ŭ 2014-m aktyvist pravioŭ 48 hadzin na pastamiencie.
Premjer Vialikabrytanii Kir Starmier adznačyŭ, što Čerčyl zastajecca hierojem nacyi, tamu vykarystańnie jaho statui ŭ palityčnych metach abražaje nacyjanalnuju pamiać.
Čytajcie taksama:
Załaty ŭnitaz z pałaca, dzie naradziŭsia Čerčyl, skrali za piać chvilin