Ukraina da leta atrymaje jašče adnu sistemu Patriot — ź Izraila

Ciapier va Ukrainie vosiem takich ustanovak SPA, ale nie ŭsie pracujuć.

Źniščalniki F-16 VPS Ukrainy pralatajuć nad sistemaj supraćpavietranaj i supraćrakietnaj abarony Patriot u nienazvanym miescy va Ukrainie, 4 žniŭnia 2024 h. Fota: AP Photo / Efrem Lukatsky

Ukraina da leta atrymaje jašče adnu sistemu supraćpavietranaj abarony Patriot, jakaja raniej znachodziłasia ŭ Izraili. Jaje dašluć paśla ramontu. A paźniej, mahčyma, pieradaduć jašče adnu ŭstanoŭku — ad Hiermanii abo Hrecyi, paviedamlaje The New York Times sa spasyłkaj na svaje krynicy.

Pra pastaŭku stała viadoma na fonie ŭzmacnieńnia rasijskich rakietnych udaraŭ pa Ukrainie.

Było hetaje rašeńnie pryniata padčas administracyi Bajdena abo pry Trampie, nieviadoma.

Ukraina maje vosiem sistem Patriot, ź jakich pracujuć tolki šeść — dźvie znachodziacca na ramoncie, paviedamiŭ vydańniu adzin ź nienazvanych amierykanskich čynoŭnikaŭ.

Kali Kijeŭ atrymaje ŭstanoŭki ź Izraila i Hiermanii abo Hrecyi, usiaho ich budzie va Ukrainie 10.

Pa danych Mižnarodnaha instytuta stratehičnych daśledavańniaŭ u Łondanie, ahułam u śviecie ekspłuatujecca kala 186 sistem Patriot, ź jakich prykładna tracina naležyć ZŠA.

Jeŭrapiejcy vałodajuć prykładna 40 sistemami (z ulikam tych 8, što va Ukrainie).

Stvareńnie adnoj ustanoŭki Patriot kaštuje minimum miljard dalaraŭ, dla jaje absłuhoŭvańnia patrabujecca kala 90 vajskoŭcaŭ.

U krasaviku Zialenski zajaviŭ, što Ukraina hatova kupić 10 kompleksaŭ Patriot za 15 miljardaŭ dalaraŭ ź finansavaj dapamohaj jeŭrapiejskich partnioraŭ, ale ZŠA nie pradajuć.

Kamientary da artykuła