Rakieta ź Jemiena ŭpała na terytoryi aeraporta Ben-Huryjon u Izraili
Balistyčnaja rakieta, vypuščanaja ź Jemiena, ranicaj u niadzielu ŭraziła terytoryju Izraila ŭ rajonie mižnarodnaha aeraporta Ben-Huryjon. Paciarpieli šeść čałaviek. Avijakampanii admianiajuć rejsy.
Fota: AP Photo / Ohad Zwigenberg
U Izraili rakieta chusitaŭ upała kala adnaho z terminałaŭ aeraporta Ben-Huryjon. Pa dadzienych miascovych ŚMI, heta pieršy vypadak, kali rakieta chusitaŭ dasiahnuła Centralnaha rajona Izraila. Jana ŭpała ŭ dziasiatkach mietraŭ ad darohi, jakaja viadzie da terminała.
Pryziamliłasia rakieta na terytoryi, dzie raźmieščanyja stajanki dla aŭtobusaŭ i taksi.
Vojska abarony Izrailu paviedamiła ab sprobach pierachapić rakietu, jakija skončylisia niaŭdała. Aeraport na niekatory čas prypyniŭ pracu, adnak paśla adnaviŭ jaje.
Prairanskaja hrupoŭka «Ansar Ała» (chusity), jakaja kantraluje značnuju častku Jemiena i vałodaje arsienałam balistyčnych rakiet, raniej užo nieadnarazova zapuskała rakiety pa terytoryi Izraila, patrabujučy spynieńnia bajavych dziejańniaŭ u siektary Haza. Jak praviła, hetyja rakiety źbivajucca sistemaj SPA, piša «Svaboda».
Pradstaŭniki chusitaŭ paśla ŭdaru pa Izraili zajavili, što jon prademanstravaŭ ich vajskovyja mahčymaści. Ministr abarony Izrailu Israel Kac u svaju čarhu zajaviŭ, što za ŭdar rušyć uśled «siamirazovaja adpłata».
Avijakampanii Lufthansa, United Airlines, Air France, Brussels Airlines, Air India, Air Canada, US Airways, Transavia, Air Europa i WizzAir paviedamili ab prypynieńni palotaŭ u Izrail.