Zapalnyja šviedy, viasiołyja estoncy, Izrail rvie serca: siońnia zachaplalny finał Jeŭrabačańnia

Siońnia ŭ šviejcarskim Bazeli projdzie finał «Jeŭrabačańnia». «Naša Niva» sabrała videa najcikaviejšych vystupaŭ.

Fota: Martin Meissner / AP

Konkurs nie pakažuć pa biełaruskim telebačańni. Ale ŭ Biełarusi ŭsio roŭna možna hladzieć konkurs — chutčej za ŭsio, budzie tranślacyja na aficyjnym jutub-kanale «Jeŭrabačańnia».

KAJ — Bara Bada Bastu (Šviecyja)

Kraina, jakaja vyjhrała ŭžo siem «Jeŭrabačańniaŭ», naceliłasia na vośmuju pieramohu. Dla hetaha jana pasyłaje ŭ Bazel hurt KAJ — troch finaŭ, jakija śpiavajuć pa-šviedsku, pryčym heta pieršaja pieśnia na nacyjanalnaj movie ad šviedaŭ z 1998 hoda.

Trek Bara bada bastu napisany na finskim dyjalekcie šviedskaj movy i pryśviečany finskaj saŭnie. Bukmiekiery praročyli šviedam pieramohu na sioletnim «Jeŭrabačańni» jašče da taho, jak byŭ vybrany pradstaŭnik krainy — pahladzim, ci spraŭdzicca prahnoz.

Louane — Maman (Francyja)

Ad pastajannych favarytaŭ «Jeŭrabačańnia» pierachodzim da štohadovych niaŭdačnikaŭ. Francyja časta adpraŭlaje na konkurs vakalna składanyja pieśni na nacyjanalnaj movie — zhadajem śpievaka Slimane, jaki ŭ 2024-m praśpiavaŭ častku pieśni bieź mikrafona. Ale ž krainie stabilna nie šancuje na konkursie: apošniaja pieramoha ŭ ich była jašče ŭ 1977-m, a ich najlepšy vynik apošniaha času — toj samy Slimane i jaho 4-je miesca.

Sioleta Francyja adsyłaje pieśniu ŭ svaim zvyčajnym dla «Jeŭrabačańnia» styli, što zasłuhoŭvaje pavahi, ale naŭrad ci dapamoža krainie spakusicca na pieramohu — takija suvoryja zakony konkursu. Ale čamu b nam prosta nie acanić pryhožy trek?

Ziferblat — Bird of Pray (Ukraina)

Našy susiedzi pasyłajuć u Bazel niešta vielmi niezvyčajnaje. U svajoj pieśni jany abjadnali i tradycyjnyja ŭkrainskija matyvy, i stylistyku chipi, i troški panku. Što da tekstu, heta historyja pra rasstańnie i ptušku, jakaja moža złučyć ludziej na adlehłaści.

U finale nacyjanalnaha adboru Ziferblat vystupali ŭ fijaletavych retrakaściumach na scenie, stylizavanaj pad kvitniejučy łužok. Asablivaj pastanoŭki ŭ numary i nie było. Chočacca vieryć, što da Bazela ŭkraincy heta vypravili, i my atrymajem stylovy numar — jeŭrapiejskija hledačy inšaha nie darujuć.

Yuval Raphael — New Day Will Rise (Izrail)

A voś heta — historyja pra natchnieńnie. 7 kastryčnika 2023-ha izrailcianka Juval Rafael prysutničała na sumna viadomym muzyčnym fiestyvali Supernova, kudy nalacieli bajeviki CHAMAS. Tady zahinuli 378 udzielnikaŭ fiestyvalu. Juval była adnoj z tych, chto vyžyŭ.

Ciapier jana reprezientuje Izrail z pryhožaj pieśniaj pra toje, što «novy dzień pryjdzie». Prychilniki prapaleścinskich pohladaŭ zaklikajuć zabanić Izrail na konkursie, ale arhanizatary suprać. 

JJ — Wasted Love (Aŭstryja)

Aŭstryjskaja opiera na «Jeŭrabačańni»? Tak! Wasted Love, pieśnia śpievaka JJ, jakraz stvoranaja ŭ takim styli.

Uražvaje mocna, tym bolš pieramožca 2024 hoda, šviejcarac Nemo, taksama ŭklučaŭ u svaju kampazicyju opierny kavałak. Ale ci spracuje recept pośpiechu druhi hod zapar? I ci zdoleje JJ dać rady ŭžyvuju takoj technična składanaj kampazicyi? Kali ŭsio ŭdasca — nie ździvimsia pieršamu miescu ad žury dla Aŭstryi.

Tommy Cash — Espresso Macchiato (Estonija)

A voś i adzin z tych dzivakoŭ, jakich my čakajem kožnaje «Jeŭrabačańnie». Śpiavak pad psieŭdanimam Tomi Keš pradstaŭlaje pieśniu na sumiesi anhlijskaj movy i taho, što možna apisać jak aŭtarskaje razumieńnie italjanskaj. Vy nie pavierycie, ale italjancy ŭžo vykazali svajo abureńnie — maŭlaŭ, u pieśni bahata kliše pra Italiju nakštałt kavy i mafijozi.

Na ščaście, my nie italjancy i možam spakojna atrymać zadavalnieńnie ad hetaj pieśni. Niezdarma Tomi Keš śpiavaje na viasiołaj trasiancy «No stresso, no stresso, no need to be depresso».

Shkodra Elektronike — Zjerm (Ałbanija)

Jašče adny elektronščyki, dy jašče i z falkłornymi matyvami dy pieśniaj na nacyjanalnaj movie. Pieśnia z nazvaj, što pierakładajecca jak «połymia», adsyłaje da ałbanskich tradycyj, dzie połymia šanujuć užo šmat stahodździaŭ i vykarystoŭvajuć u rytuałach. 

U klipie da videa Bieatryče, udzielnica dueta Shkodra Elektronike, tančyć u stylizavanaj viersii chublety — ałbanskaha narodnaha adzieńnia. Spadziajomsia, u sceničnaj viersii budzie nie mienš pavahi da tradycyj.

Katarsis — Tavo Akys (Litva)

Bukmiekiery nie majuć asablivych nadziej nakont hetaj kampazicyi, ale nie adznačyć jaje było b niespraviadliva. Pakul šmat inšych krain vybirajuć biaśpiečnuju pop-stylistyku, našy susiedzi viazuć na konkurs niezvyčajny, pryhožy i stylovy indzi-rok.

Tut niama vyčvarnych śpiecefiektaŭ i natoŭpu padtancoŭki, jość tolki vykanaŭcy i ich emacyjnaja pieśnia. Pahladzim, ci ŭdasca ŭ Katarsis realizavać zadumu takoha vystupu na naležnym uzroŭni.

Kamientary da artykuła