Śmierć važnaha hieroja i novaja niebiaśpieka. Što pakazali ŭ druhim siezonie chitovaha sieryjała The Last of Us

Vychodzić druhi siezon topavaha sieryjała «Apošnija z nas» (The Last of Us). Pakul dastupny tolki dźvie sieryi, ale, miarkujučy pa ich, jakaść znoŭ na vyšyni — raskazvajem, što atrymałasia.

Fota: kadr z trejlera

«Apošnija z nas» źjavilisia ŭ studzieni 2023-ha. Za novy sieryjał uziałasia kamanda z udziełam Krejha Mejzina, pradziusara «Čarnobyla» — inšaha sieryjalnaha chita ad kanała HBO. 

Asnova sieryjała — kampjutarnaja hulnia 2013 hoda pad nazvaj The Last of Us. Heta śviet niedalokaj budučyni, dzie niadaŭna lutavała strašennaja pandemija. Hryb kardyceps, jaki spakojna vykarystoŭvajuć u miedycynie, raptam muciravaŭ i pačaŭ pieratvarać ludziej u sapraŭdnych zombi. Tyja, jak i naležyć zombi, kusali zdarovych ludziej i pieratvarali ich u padobnych da siabie — hetaki apakalipsis, raściahnuty ŭ časie.

Niekatoryja, adnak, zdoleli vyratavacca. Ciapier jany budujuć novaje žyćcio i ź pieramiennym pośpiecham adbivajuć ataki chvorych. 

Dvoje z žycharoŭ hetaj antyŭtopii, kantrabandyst Džoeł i 14-hadovaja sirata Eli, musiać pierasiekčy terytoryju byłych ZŠA, kab vykanać zahad «Cykadaŭ» — vajenizavanaj hrupoŭki paŭstancaŭ. Padčas šlachu pamiž imi ŭźnikaje siabroŭstva, i Džoeł z Eli razam adkryvajuć dla siabie maštabnuju karcinu postapakaliptyčnaj Amieryki.

Hety siužet zachavaŭsia i ŭ pieršym siezonie sieryjała «Apošnija z nas». I heta byŭ pośpiech! Krytykam spadabałasia jakaść sieryjała i jaho vidoviščnaść, a taksama chimija pamiž vykanaŭcami hałoŭnych rolaŭ Piedra Paskalem i Bełaj Remzi. Rejtynhi ŭ hledačoŭ byli nie horšyja — pieršy siezon «Apošnich z nas» akazaŭsia samym prahladalnym z usich pieršych siezonaŭ sieryjałaŭ na HBO. Zdajecca, tady pra sieryjał havaryli paŭsiul.

Fota: kadr z trejlera

Ničoha dziŭnaha, što novy siezon vielmi čakali. Pieršaja sieryja vyjšła 13 krasavika. Usiaho sieryj budzie siem.

Novy siezon zasnavali na sikvele hulni The Last of Us, jaki vyjšaŭ u 2020-m. Džoeł i Eli ŭžo piać hadoŭ žyvuć u haradku Džeksan, što ŭ amierykanskim štacie Vajominh, i ciapier ich adnosiny daloka nie takija śvietłyja, jak heta było ŭ pieršym siezonie. Niahledziačy na ich svarki, u žyćcio nibyta pryjšła stabilnaść: Džoeł navat pajšoŭ da psichaterapieŭtki, pakul Eli znachodzić sabie novyja adnosiny.

Tym časam vorahi nie śpiać. Džoeła čakaje pomsta za toje, što jon zrabiŭ u pieršym siezonie dla Eli, ale ž u niebiaśpiecy i sam horad Džeksan, bo zombi źmianiajucca i padbirajucca ŭsio bližej. 

Heta ŭžo nie toj roŭd-muvi, jaki my bačyli ŭ pieršym siezonie. Paśla tych dekaracyj i śpiecefiektaŭ ciažka raskazać pra suśviet The Last of Us niešta novaje, i kahości moža rasčaravać, što vaŭ-efiektu ŭžo nie budzie.

Fota: kadr z trejlera

Pieršaja sieryja trochi zaciahnutaja, ale ŭ druhoj budzie i pierastrełka, i novaja sustreča ź infikavanymi. Ale hałoŭnaje nie heta — rychtujciesia da straty adnaho z hierojaŭ, jakaja razabje vam serca, i hetaja padzieja, vierahodna, nie spadabajecca šmat kamu z fanataŭ.

A jašče ŭ sieryjale źjaviłasia novaja značnaja hierainia. Heta Ebi, zmaharka z Vašynhtonskaha vyzvolnaha frontu i adna z tych, chto rychtuje pomstu dla Džoeła. Jaje rolu addali Kejtlin Dyvier, zorcy «Jabłyčnaha vocatu» — amierykanka znoŭ dobra dała rady pracy.

Varta pryznać — z novym siezonam kanał HBO nas nie padvioŭ. Sieryjał uražvaje i akciorskaj pracaj, i jakaściu realizacyi prajekta na ŭsich uzroŭniach.

«Apošnich z nas» jašče paru tydniaŭ tamu padoŭžyli na treci siezon, ale ŭ hetym svaja ryzyka. Časam stvaralniki sieryjałaŭ nie mohuć svoječasova zakryć paśpiachovy prajekt, niahledziačy na toje, što skazać u im užo niama čaho, i tak fajnyja prajekty robiacca achviarami svajoj papularnaści. «Apošnija z nas» byli śviežym dychańniem u sieryjalnym śviecie, tamu ŭ hetym płanie prajekt pad asablivaj ryzykaj.

Kamientary da artykuła