Jeŭrasajuz adkłaŭ zabaronu impartu rasijskaha zvadkavanaha hazu

Jeŭrapiejskija čynoŭniki admovilisia ad uklučeńnia ŭ novy pakiet sankcyj suprać Rasii rasijskaha zvadkavanaha pryrodnaha hazu (ZPH) z-za roznahałośsiaŭ pamiž uradami i niavyznačanaści adnosna alternatyŭ. Pra heta piša Reuters sa spasyłkaj na pradstaŭnikoŭ Jeŭrapiejskaha sajuza.

Kałaž: Jonathan Raa/NurPhoto via Getty Images

Čakajecca, što Jeŭrapiejskaja kamisija prapanuje 17-y pakiet sankcyj suprać Rasii da červienia, choć surazmoŭcy Reuters adznačajuć, što praca nad im prasoŭvajecca vielmi pavolna.

Apošni raz Jeŭrakamisija abmiarkoŭvała mahčymuju zabaronu impartu rasijskaha ZPH z uradami ES u studzieni padčas padrychtoŭki 16-ha sankcyjnaha pakieta.

Raniej prezident ZŠA Donald Tramp nieadnarazova zajaŭlaŭ, što choča, kab ES kuplaŭ bolš amierykanskaha hazu. Pavodle infarmacyi Reuters, u Bruseli razhladajuć heta jak mahčymy ryčah u pieramovach, kab pierakanać Bieły dom źnizić mytnyja taryfy.

Adzin z surazmoŭcaŭ ahienctva raskazaŭ, što Jeŭrakamisija nie choča ryzykavać strataj rasijskaha ZPH, kab nie sastupić pazicyi ŭ pieramovach z ZŠA. Akramia taho, Jeŭrakamisija i ŭrady ES aścierahajucca trapić u novuju zaležnaść ad Złučanych Štataŭ, jakija źjaŭlajucca trecim pa vieličyni pastaŭščykom hazu ŭ ES paśla Rasii i Narviehii, dadaje Reuters.

Jeŭrapiejskija čynoŭniki majuć namier pryniać novuju darožnuju kartu admovy ad rasijskich enierharesursaŭ da 2027 hoda. Płan pavinny abviaścić u mai.

Kamientary da artykuła