Kavali: Ja nie čakaŭ, što Ukraina tak padarvie vajenny patencyjał Rasii
Hałoŭnakamandujučy NATA ŭ Jeŭropie na słuchańniach u Kamitecie pa ŭzbrojenych siłach Sienata ZŠA zajaviŭ, što vajna va Ukrainie surjozna źmianiła jak rasijskuju, tak i ŭkrainskuju armiju: rasijskaja armija dehraduje, a ŭkrainskaja chutka evalucyjanuje.
Hałoŭnakamandujučy NATA ŭ Jeŭropie hienierał Krystafier Kavali. Skryn videa: ntdtv / YouTube
Hałoŭnakamandujučy abjadnanymi siłami NATA ŭ Jeŭropie hienierał Krystafier Kavali na słuchańniach u Kamitecie pa ŭzbrojenych siłach Sienata ZŠA adkazaŭ na pytańni staršyni kamiteta Rodžera Uikiera i jaho namieśnika Džeka Ryda. Razmova išła pra vyniki i pierśpiektyvy vajny va Ukrainie.
Papiarednija vyniki vajny
«U lutym 2022 hoda my i maryć nie mahli pra takija straty rasijskich tankaŭ, praŭda?» — spytaŭ Uikier.
«Nie mahli, — pahadziŭsia Kavali. — Ja nie čakaŭ, što vajna praciahniecca tak doŭha, i nie čakaŭ, što Ukraina tak padarvie vajskovy patencyjał Rasii».
Pa słovach hienierała, techničny ŭzrovień rasijskich śpiecyjalistaŭ u asobnych vidach vojska sapraŭdy vysoki i evalucyjanavaŭ na praciahu vajny, ale heta nie ahulnaja tendencyja.
«U cełym jakaść rasijskich vojskaŭ, asabliva suchaputnych, horšaje ź ciaham vajny», — adznačyŭ Kavali.
U procivahu hetamu, ukrainskaja armija, pavodle jaho acenki, pačynała z «chałodnaha startu», ale vielmi chutka raźviłasia i adaptavałasia.
Sienatar Uikier spytaŭ, ci dapamoža NATA dośvied ukrainskaj vajny ŭ supraćstajańni z Rasijaj u vypadku mahčymaha sutyknieńnia.
«O tak, spadar staršynia», — adkazaŭ hienierał.
Razmova zakranuła i stan rasijskaj ekanomiki.
«Rasijski ŭrad pieraklučyŭ abaronnuju śfieru ŭ turbarežym. Heta vyklikała vializny inflacyjny cisk, asabliva ŭ hramadzianskim siektary. Ułady adkazali vielmi vysokimi pracentnymi staŭkami, kab strymać inflacyju — i heta dušyć nievajskovy siektar ekanomiki», — patłumačyŭ Kavali.
Pavodle jaho, rasijski abaronny siektar demanstruje burny rost, ale hramadzianski — faktyčna atrafiravaŭsia. I vyrašyć hety dysbałans Rasii budzie vielmi niaprosta.
Pierśpiektyvy vajny
Što da stanovišča na froncie, to hienierał adznačyŭ, što, niahledziačy na ciažkaści, ukraincy trymajucca i pakazvajuć zdolnaść da inavacyj.
«Ukrainskaja armija maje prablemy, ale ŭsio jašče ŭtrymlivaje značnyja terytoryi, daje adpor rasijanam i aktyŭna ŭkaraniaje inavacyi na poli boju», — skazaŭ jon.
Kavali nahadaŭ, što Rasija jašče ŭ vieraśni 2024 hoda źbirałasia vybić ukraincaŭ z Kurskaj vobłaści, ale tyja dahetul trymajuć tam płacdarm — i navat zajšli ŭ Biełharadskuju vobłaść.
«Za Časaŭ Jar i Tareck iduć bai ŭžo vosiem miesiacaŭ (za Časaŭ Jar amal hod — z krasavika 2024-ha — NN). U apošnija miesiacy rasijski nastup pačaŭ vydychacca ŭ maštabach i zachoplenych terytoryjach. Jany padyšli blizka da Pakroŭska, ale zahruźli tam», — adznačyŭ hienierał.
Pry hetym, pavodle jaho, u Rasii brakuje i braniatechniki, i žyvoj siły. Ukraina ž zaniała dobryja abarončyja pazicyi i, imavierna, vyrašyła častku svaich prablem z mabilizacyjaj.
«Jany pašyryli kolkaść mabilizavanych, pavialičyli kolkaść dobraachvotnikaŭ i praviali dobruju pracu pa pierakidvańni tyłavych padraździaleńniaŭ na front», — skazaŭ Kavali.
Razam z tym, hienierał vykazaŭ skieptycyzm nakont taho, što Ukraina zdolnaja ŭ bližejšy čas pravieści bujnoje nastupleńnie.
«Ciažka pradkazać vialikaje nastupleńnie Ukrainy, kali siadziš tut ciapier», — skazaŭ jon.
Taksama Kavali paćvierdziŭ, što krainy Jeŭropy źviarnulisia z prośbaj ab raźmiaščeńni na svajoj terytoryi hipierhukavoha ŭzbrajeńnia dalniaha radyusu dziejańnia.
«Jość zapyt na raźmiaščeńnie adnoj z hetych sistem u Jeŭropie. Ja mahu raskazać pra heta padrabiaźniej na zakrytym pasiadžeńni», — adznačyŭ jon.
U hetym kantekście jon nahadaŭ pra vychad ZŠA z Damovy ab likvidacyi rakiet siaredniaj i mienšaj dalokaści ŭ 2019 hodzie.
«Heta byŭ važny krok, i nam varta atrymać z hetaha maksimalnuju karyść», — zajaviŭ hienierał.
Čytajcie taksama:
Hod Syrskaha. Jak vajuje ŭkrainskaja armija z hetym hałoŭnakamandujučym