Stan Papy Franciška zastajecca krytyčnym, jamu zrabili pieralivańnie kryvi

Stan 88-hadovaha Papy Rymskaha Franciška, u jakoha vyjavili pnieŭmaniju, zastajecca krytyčnym. Jon dahetul znachodzicca ŭ špitali, paviedamlaje Vatican News.

Fota: Andrew Medichini / AP

Adznačajecca, što siońnia ranicaj Francišak pieražyŭ astmapadobny dychalny kryz praciahłaj intensiŭnaści, i heta patrabavała ŭviadzieńnia kisłarodu ŭ jahony arhanizm «u vialikaj kolkaści». Jamu taksama zrabili pieralivańnie kryvi, tamu što analizy vyjavili trombacytapieniju, źviazanuju z aniemijaj.

«Śviaty Ajciec zastajecca badziorym i ŭvieś dzień pravioŭ u kreśle, choć adčuvaje siabie bolš niazručna, čym učora. U ciapierašni čas prahnoz zastajecca aściarožnym», — pieradaje Vatican News.

Papu Rymskaha Franciška špitalizavali dla lačeńnia branchitu 14 lutaha. Jašče za dva dni da hetaha, padčas čarhovaj aŭdyjencyi, z-za drennaha samaadčuvańnia Papa nie zmoh dačytać svaju pramovu i paprasiŭ pra heta inšaha śviatara.

U pres-słužbie pantyfika paśla raskazali, što polimikrobnaja infiekcyja ŭźnikła na fonie bronchaektazaŭ i astmatyčnaha branchitu i patrabuje vykarystańnia korcikasteroidaŭ i antybijotykaŭ. Heta ŭskładniaje terapieŭtyčnaje lačeńnie, padkreślili pradstaŭniki papy Franciška.

Paśla ŭ Franciška dyjahnastavali dvuchbakovuju pnieŭmaniju, jakaja patrabuje dadatkovaha lačeńnia. U jahonaj pres-słužbie dadajuć, što, niahledziačy na zachvorvańnie, papa Francišak «zastajecca ŭ dobrym nastroi».

Na hetym fonie adzin z kardynałaŭ navat zajaviŭ, što Francišak moža adračysia ad papskaha pasadu pa stanie zdaroŭja, ale dziaržsakratar Vatykana nazvaŭ heta «niepatrebnymi śpiekulacyjami».

Kamientary da artykuła