Novaja redakcyja pahadnieńnia Ukrainy z ZŠA ab karysnych vykapniach moža być jašče kabalniejšaj za papiaredniuju

Novy varyjant pahadnieńnia z ZŠA ab redkaziamielnych karysnych vykapniach našmat bolš ciažejšy dla Ukrainy, čym papiaredniaja redakcyja. U Vašynhtonie chočuć mieć pad svaim kantrolem 100% vykapniaŭ. Pra heta pišuć CNN i ŭkrainskaje vydańnie NV, spasyłajučysia na ŭłasnyja krynicy.

Prezident ZŠA Donald Tramp. Fota: Pool via AP

Adznačajecca, što ZŠA chočuć atrymać ad Ukrainy «bolš, čym jana sama vydatkavała na ŭłasnuju abaronu». Tamu takoje pahadnieńnie nieprymalnaje dla prezidenta Ukrainy Uładzimira Zialenskaha.

NV piša, što novaja viersija pahadnieńnia prapanuje zamacavać za ZŠA 100% ułasnaści budučaha fondu i raźmierkavać unioski bakoŭ u fondzie ŭ suadnosinach 2 da 1, dzie ŭkrainski bok unosić 2/3 budučymi pastupleńniami ad zdabyčy, a amierykanski bok — tracinu, jakuju ŭžo pieradała ŭ vyhladzie zbroi.

Pavodle danych vydańnia, pamier fondu amierykanski bok prapanuje vyznačyć na ŭzroŭni 500 miljardaŭ dalaraŭ, a sama ździełka pavinna achoplivać nie tolki minieralnyja vykapni, ale i haz dy naftu. Pytańnie harantyj biaśpieki vynosicca za miežy takich damoŭlenaściaŭ.

Pavodle krynicy CNN, ukraincy ŭsio jašče sprabujuć damahčysia źmienaŭ u pahadnieńni, pakolki ŭ ciapierašnim vyhladzie jano «nie praduhledžvaje nijakich abaviazacielstvaŭ z boku ZŠA, u toj čas jak Ukraina pavinna addać usio».

Napiaredadni vydańnie Axios, spasyłajučysia na ŭłasnyja krynicy, paviedamlała, što Vašynhton pradstaviŭ «palepšanuju» viersiju pahadnieńnia. Pavodle infarmacyi žurnalistaŭ, ZŠA i Ukraina viali pieramovy ŭsiu noč na piatnicu 21 lutaha.

Kamientary da artykuła